बाहुण्डाँगी । एरिया ‘ए’ मा रहेका जेसीज शाखाका महासचिवहरुको भेला यहि साउन १० र ११ गते हुने भएको छ ।
गत जेठ १८ गते सम्पन्न झापाका महासचिवहरुको भेलाले साउन १० र ११ गते महासचिव तालिम सहित भेला गर्ने निर्णय गरेको थियो । झापामा रहेका १४ वटा शाखाको सयुक्त आयोजनामा हुन लागेको महासचिव तालिम दुई दिन सञ्चालन हुनेछ । जसको पहिलो दिन एमसी ट्रेनिङ र फिलोसीप डेब्लोप्मेन्ट तथा दोस्रो दिन माइनुट लेखन ट्रेनिङ र समापनको कार्यक्रम सञ्चालन हुनेछन् । यसैगरी, ट्रेनर भने केही दिन भित्रमा नेपाल जेसीजबाट टुङ्गो लाग्नेछ । भेलामा एरिया ए मा रहेका ३९ वटा शाखाका महासचिवहरु भेला हुनेछन् ।
मेचीनगर १३ को चारआलीस्थित एफसी कर्नरमा हुने भेलामा नेपाल जेसीजका महासचिव तथा एरिया ए बाट नेपाल जेसीजमा महासचिवको जिम्मेवारी सम्हालेका पूर्व महासचिवहरुको सहभागिता रहनेछ । भेला सम्पन्न गर्नका लागि चारआली जेसीजका महासचिव सञ्जय निरौलाको संयोजत्वमा झापाका ५ जना महासचिवहरु व्यवस्थापनका लागि चयन गरिएको छ । जसमा विर्ता जेसीजका कुशल खतिवडा, भद्रपुर जेसीजका डिल्लीराम पोखरेल, धुलावारी जेसीजका डिल्लीराम भण्डारी र अर्जुनधारा जेसीजका भाष्कर भट्टराई रहनु भएको छ । यसैगरी, प्रचार विभाग प्रमुखमा बाहुण्डाँगी जेसीजका महासचिव देबु बानियाँलाई चयन गरिएको छ । भेलाको तयारीका लागि विभिन्न कामहरु भइरहेको र गत जेठ १४ गते सम्पन्न झापा पूर्व अध्यक्ष समाजको भेलामा समेत जानकारी गराइसकिएको संयोजक सञ्जय निरौलाले बताउनु भयो ।
