उर्लाबारी
बेतिनी सीमसार उर्लाबारी–२ मंगलबारेले शुक्रबारदेखि बोटिङ सेवा सञ्चालनमा ल्याएको छ । शुक्रबार सीमसार व्यवस्थापन समितिले औपचारिक कार्यक्रमको आयोजना गर्दै उर्लाबारी नगरपालिकका प्रमुख खड्गबहादुर फागोले डुंगा चढेर बोटिंग सेवाको औपचारिक रुपमा उद्घाटन गर्नुभयो ।
सीमसार व्यवस्थापन समितिले पहिलो चरणमा दुई वटा डुंगा सञ्चालनमा ल्याएको छ । सीमसारमा अवस्थित पोखरीमा ती डुंगा सञ्चालनमा ल्याइएको हो ।
बोटिङ सेवा उद्घाटन गर्दै नगर प्रमुख फागोले सीमसारको दिगो विकास र व्यवस्थापनका लागि सहयोग गर्ने प्रतिबद्धता व्यक्त गर्नुभयो । उहाँले सीमसारको विकासका लागि नगरपालिकाको तर्पmबाट सम्मानजनक बजेट छुट्याइने बताउनुभयो ।
यस्तै,कार्यक्रममा बोल्दै सेक्टर वन कार्यालय मंगलबारेका रेञ्जर विश्वराज पण्डितले बेतिनी सीमसारले पर्यटन प्रवद्र्धन गर्नुका साथै जैविका विविधता संरक्षणमा पनि ठूलो भूमिका खेलेको औल्याउनुभयो ।
कार्यक्रममा बेतिनी सीमसार व्यवस्थापन समितिका संयोजक कृष्णप्रसाद दाहालले सीमसारमा डुंगा सञ्चालन गरिएको औचित्य पुष्ठि गर्दै उहाँले पर्यटन प्रवद्र्धनमा डुंगाले महत्वपूर्ण भूमिका निर्वाह गर्ने बताउनुभयो ।
सीमसारमा राखिएका ती डुंगा एक लाख ९० हजार खर्चिएर ल्याइएको हो । डुंगा उद्घाटनको पहिलो दिन समितिले स्थानीय र आगन्तुकहरुलाई निःशुल्क रुपमा डुंगा चढाएको थियो । समितिले डुंगा चढे बापत प्रति व्यक्ति ५० रुपैयाँ लिने जनाएको छ ।
बेतिनी सीमसार परिसरमा बाल उद्यान निर्माण कार्यक्रम पनि भइरहेको सीमसार व्यवस्थापन समितिका सचिव गोपाल खरेलले जानकारी दिनुभयो ।
सीमसारको सहर भनेर घोषणा गरिएको उर्लाबारीमा बेतिनी,लामपाते,बुढाठाकूर सीमसार लगायत अन्य सीमसार क्षेत्रहरु रहेका छन् ।
कार्यक्रममा वडा नम्बर २का वडाध्यक्ष राजन कडेँल,वडा सदस्यहरु गोविन्द चौम्लागार्इँ,बाबुराम श्रेष्ठ,बानु सुब्बा लगायतको उपस्थिती रहेको थियो ।
