कास्की, भाद्र ३ । प्रहरी महानिरीक्षक (आईजीपी) सर्वेन्द्र खनालले प्रहरी कर्मचारीहरुलाई कसैको दबाबमा नपरी काम गर्न निर्देशन दिएका छन् । खनालले प्रत्येक प्रहरीले भावनामा शुद्धता राखी छिटो, छरितो र उत्कृष्ट कार्य सम्पादनतर्फ अगाडि बढ्न निर्देशन दिएका हुन ।
संघीय प्रहरी इकाई कार्यालय पोखराको नवनिर्मित कार्यालय भवनको मंगलबार आयोजित एक कार्यक्रमबीच उद्घाटन गर्दै खनालले यस्तो बताएका हुन् । खनालले सोही कार्यालय परिसरमा निर्माण हुन लागेको ब्यारेक भवनको समेत शिलान्यास गरे ।
उत्कृष्ट कार्य गर्ने प्रहरी कर्मचारीलाई प्रशंसापत्र वितरण गर्दै उनले सुन्दर भवन समयमै निर्माण सम्पन्न हुनु र भवन निर्माणमा लागत घट्नु राम्रो पक्ष रहेको भए पनि त्यसको गुणस्तरमा समेत ध्यान दिनुपर्ने बताए ।
नागरिक र प्रहरीबीचको समन्वयात्मक भूमिकालाई थप रचनात्मक एवं प्रभावकारी बनाउन सामुदायिक प्रहरी सेवा केन्द्रको विकल्पको रुपमा समुदाय–प्रहरी साझेदारी कार्यक्रम विकसित गरिएको खनालको भनाइ छ । राष्ट्रिय पुनर्निर्माण प्रधिकरण कोषको सहयोगमा निर्माण सम्पन्न भएको साढे दुई तल्ले कार्यालय भवनको कूल लागत २ करोड ७८ लाख ७० हजार २ सय ९५ रुपैयाँ ७३ पैसा रहेको छ ।
