भाद्र ११, काठमाडौं । व्यवसायीले सादा पोसाकमा खटिने घुमुवा प्रहरीले आतंक मच्चाएको आरोप लगाएका छन् । घुमुवा प्रहरीको व्यवहारबाट आजित भएर व्यवसाय नै बन्द गर्ने अवस्था उत्पन्न भएको उनीहरूको भनाइ छ ।
ऐन कानुनविपरीत प्रहरीले बिनाकुनै आधार व्यापारिक प्रतिष्ठानहरूमा पुगेर अनुगमनको नाउँमा तर्साउने र धम्काउने कार्य गरिरहेको धनुषा चेम्बर्स अफ कमर्सले आरोप लगाएको छ ।
घुमुवा प्रहरीको यस्तो क्रियाकलाप रोक्न आफूहरूले प्रदेश २ का आन्तरिक मामिला तथा कानुनमन्त्रीलाई भेटेर ज्ञापनपत्रमार्फत ध्यानाकर्षण गराएको अध्यक्ष विजयकुमार साहले बताए । जनकपुर प्रदेशको राजधानी भएपछि आफूहरू उत्साहित भए पनि पछिल्लो समय प्रहरी प्रशासन र भन्सारबाट अनुगमन तथा निरीक्षणको नाममा व्यापारीहरूलाई तर्साउने कार्य भइरहेको साहको भनाइ छ । खास गरेर प्रदेश प्रहरी कार्यालयबाट खटिएका घुमुवा प्रहरीले जनकपुरधाम बजार क्षेत्रभित्र आतंक मच्चाएको उनले बताए ।
भ्याट बिल हुँदासमेत घुमुवा प्रहरीले अनावश्यक पैसा माग्ने र नदिएको खण्डमा मालसमान नै नियन्त्रणमा लिई भन्सारलाई बुझाउने गरेको कमर्स अध्यक्ष साह बताउ“छन् । राजधानीबाट ।
