दाङ, १३ पुस, एक श्रीमतीले आफ्ना श्रीमानको हातका औंला काटेर पोलेर खाएको घटना सार्वजनिक भएको छ । तुलसीपुर उपमहानगरपालिका वडानम्बर १ भम्के छोटे बस्ने ६४ वर्षीया रिसमी महतराले आफ्नो श्रीमान चन्द्रबहादुरको दायाँ हातका चारवटा औँला काटेर पोलेर खाएकी हुन् ।
रिसमीले गएराति आठ बजेतिर श्रीमान चन्द्रबहादुरको दायाँ हातका चार वटा औंला काटेर पोलेर खाएको उजुरी परेपछि घटना सार्वजनिक भएको छ । रिसमीलाई तुलसीपुर प्रहरीले पक्राउ गरेको जनाएको छ ।
चन्द्रबहादुरलाई आज बिहान उपचारका लागि तुलसीपुर ल्याइएको थियो। राप्ती अञ्चल अस्पताल तुलसीपुरमा उपचार हुन नसकेपछि थप उपचारको लागि चन्द्रबहादुरलाई नेपालगञ्जतर्फ पठाइएको प्रहरीले जनाएको छ ।
गएराती मदिरा सेवन गरी घर आएका श्रीमानलाई समातेर उनले घरेलु हतियारले औंला काटिदिएकी थिइन् । आवेगमा आएर औंला काटिदिएको र पोलेर खाएको रिसमीले प्रहरीलाई बयान दिएकी छन् ।
रिसमी चन्द्रबहादुरकी जेठी श्रीमती हुन् । चन्द्रबहादुरका ६ वटी श्रीमती रहेको तर जेठी श्रीमतीसँग बस्दै आएको स्थानीय बताउँछन् ।
तस्विर: फेसबुकबाट
