काठमाडौं । गत शुक्रबार चिनियाँ ह्याकरले दरबारमार्गमा रहेको नविल बैंकबाट बिभिन्न बैंकका एटिएम प्रयोग गरि एक करोड बढी रकम झिकेपछि बैंकिङ क्षेत्रमा तरंग पैदा गरिदिएको छ । चिनियाँ ह्याकरले नेपालका बैंकमा मात्र नभएर भारतीय बैंकबाट समेत रकम झिकेको खुलासा भएको छ ।
गएको शुक्रबार नेपालका विभिन्न एटीएमबाट चिनियाँ ह्याकरको टोलीले जथाभावी पैसा झिकेपछि राष्ट्र बैंकले एउटा छानबिन टोली गठन गरेको थियो । उक्त टोलीले अध्ययन गर्दै नेपाल र भारतबाट ह्याकरले पैसा झिकेको निष्कर्ष निकालेको छ ।
ह्याकरहरुले नेपालका नेप्स प्रणालीमा आबद्ध ७ वटा बैंकको कार्ड प्रयोग गरेर नेपाल र भारतबाट गरी ३ करोड ५८ लाख रुपैयाँ रकम झिके टोलीको दावी छ ।
छानबिन टोलीको प्रतिवेदनअनुसार ह्याकरले नेप्समा आवद्ध ७ वटा बैंकका भिसा कार्ड क्लोन गरेर ३ करोड ५८ लाख रुपैयाँ पैसा झिकेका छन् । ह्याकरले नेपालबाट १७ बैंकका ६८ एटीएम कार्ड प्रयोग गरेर १ करोड ८९ लाख ४४ हजार रुपैयाँ झिकेका छन् भने भारतबाट नेपालका ६ वटा बैंकको १ करोड ५ लाख ८७ हजार रुपैयाँ झिकेका छन् ।
उनीहरूले भारतीय २४ बैंकका १ सय ३२ एटीएम प्रयोग गरेको पनि अध्ययन समितिको प्रतिवेदनमा खुलासा गरिएको छ ।
