काठमाडौं । नेपाली कांग्रेस कार्यसम्पादन समितिको बैठक शुक्रबार बिहान बस्दैछ । सभापति तथा प्रधानमन्त्री शेरबहादुर देउवाले बिहान ८ बजेका लागि कार्यसम्पादन समितिको बैठक डाकेका हुन् ।
बैठक प्रदेश सभाको समानुपातिकतर्फको उम्मेदवारहरूको नामावलीको टुङ्गो लागउनका लागि डाकिएको सचिवालयका मुख्य सचिव कृष्णप्रसाद पौडेलले जानकारी दिए ।
काँग्रेसले प्रदेश सभाका लागि ७२ जनाको समानुपातिकको नामावलीको टुङ्गो लगाउनुपर्नेछ ।
निर्वाचन आयोगले शुक्रबार कार्यालय समयभित्रै नामावली आयोगमा बुझाउन दलहरूलाई पत्राचार गरेको थियो ।
त्यसबाहेक बैठकमा समसामयिक राजनीतिक परिस्थितिबारे पनि छलफल गरिने कार्यसूची रहेको छ ।
निर्वाचनको परिणामका विषयलाई लिएर पार्टीको बैठक बोलाउन नेपाली काँग्रेसका केही केन्द्रीय सदस्यले माग गर्दै आएका छन् ।
कार्यसम्पादन समितिको बैठकपछि केन्द्रीय समितिको बैठकको मिति तोकिने सचिवालयले जनाएको छ ।
केन्द्रीय सदस्य डा शेखर कोइरालाले खुलेआम नै केन्द्रीय समिति बैठक बोलाउन देउवालाई आब्हान गरिसकेका छन् ।
