काठमाडौं १५ पुष २०७४ रातोकलम ।
जालझेलपूर्ण तरिकाले आफ्नो घरजग्गा अर्कैले बेचिदिएपछि घरबारविहीन अवस्थामा पुगेका पीडित मानबहादुर लिम्बु न्यायको निम्ति भौतारिरहेका छन् ।
पीडित लिम्बुले आफूलाई न्याय दिलाउन सबैसँग अपिल गरेका हुन् । शनिवार रातोकलमसँग कुराकानी गर्दै लिम्बुले आफुलाई न्याय दिलाउन सबैसँग अपिल गरेका हुन् । पुख्र्याैली घर ताप्लेजुङ, थेचम्बु–४ रहेका लिम्बु केही वर्षदेखि ललितपुर इमाडोलमा घर बनाई बस्दै आएका छन् । आफूलाई घरव्यहार चलाउन खर्च आवश्यक परेपछि उनले आफूसँग भएको आठ आना जग्गा १५ लाख रुपैयाँमा बैंकमा धितो राखेका थिए ।
पछि छिमेकीले आफ्नै जग्गा साँधमा रहेको दुई आना तीन पैसा जग्गा बेच्ने भएपछि उनले थप २० लाख रुपैयाँ ऋण लिए । ऋण लिनको लागि चिनजानमा रहेका कुपण्डोल निवासी विनोदबहादुर खड्कासँग सल्लाह गरे । तर, ऋण लिन खड्काले धितो रहेको जग्गा आफ्नो नाममा राजीनामा गरिदिन अनुरोध गरे । लिम्बु पनि खड्काको विश्वासमा परी आफ्नो नाममा रहेको आठ आना जग्गा राजीनामा पास गरिदिए ।
जग्गा लिएपनि बीचमा थप ७ लाखका लागि लिम्बुले खड्कालाई नै गुहारे । खड्काले पैसा चाहिए अर्काे दुई आना तीन पैसा जग्गा पनि आफूलाई राजीनामा करार गरिदिएमात्रै पैसा दिने बताए । यसपछि लिम्बुले थप दुई आना तीन पैसा जग्गा पनि खड्कालाई राजीनामा करार गरी दिए ।
पछि ऋण चुक्ता गर्न बैंकले ताकेता गर्न थालेपछि सोही जग्गा बेच्ने निधो गरे । ‘बैंकको लोन तिर्न हामीले एक करोड ११ लाख रुपैयाँमा जग्गा बेच्यौं’, लिम्बुले रातोकलमसँग भने, ‘बैंकको ऋण तिरेपछि उभ्रिएको पैसा खड्काले आफूले चलाइराख्ने र पछि तिर्ने शर्त राखे । मैले पनि दिएँ ।’
त्यसपछि खड्का सम्पर्कविहीन हुन पुगेको र सम्पर्क गर्दा पनि फोन नउठाउने गर्न थालेपछि लिम्बु छाँगाबाट खसेसरह भए । हाल उनले साबिक भोगचलन गरिरहेको घरजग्गा तीन–चार जनाबीच किनबेच भइसकेको र खड्काबाट ठगिएको महसुस गरेपछि उनी न्यायलय धाइरहेका छन् । पीडित भन्दा पनि पीडकको पक्षमा न्यायलयले साथ दिएको उनको आरोप छ ।
