दाप्चा । नेपाली कांग्रेसका युवा नेता गणेश लामाले दुईतिहाइको बलियो कम्युनिस्ट सरकारको दिन प्रतिदिन ग्राफ घट्दै गएको बताएका छन् ।
नेपाली कांग्रेस नमोबुद्ध नगर कार्यसमितिले काभ्रे जिल्लाको दाप्चामा शनिबार आयोजना गरेको चियापान तथा शुभकामना आदान प्रदान कार्यक्रममा सम्बोधन गर्दै लामाले कम्युनिस्टहरुको गलत हर्कतले जनता आजित बनेको बताए । उनले गलत निर्याय र हर्कतले गर्दा कम्युनिस्ट सरकारको ग्राफ घटेको बताए ।
कम्युनिस्ट सरकारलाई विदेशीले पनि विश्वास नगरेको भन्दै नेपाली कांग्रेसका युवा नेता लामाले जनतालाई चर्को कर लगाएको बताए ।
‘विदेशीले सहयोग नदिएपछि यो कम्युनिस्ट सरकारले जनतालाई चर्को कर लगाएको छ’, उनले भने, ‘जनतासँग चर्को कर उठाएर कम्युनिस्ट सरकारले आफूहरुका लागि सुविधा लिने र कार्यकर्ता पोस्ने कार्य गरेको छ ।’
नेपाली कांग्रेसले अबको निर्वाचन कुनै पनि हालतमा जित्ने उनले बताए । त्यसका लागि सबै मिलेर कांग्रेको संगठन बनाउनुपर्ने लामाले बताए । उनले भने, ‘कम्युनिस्टहरुको भ्रष्टाचारलाई गाउँ गाउँमा लगेर जनता समक्ष उदाङगो बनाइदिनुपर्छ ।’
