देबु बानियाँ
बाहुण्डाँगी । म्याग्दी जेसीज एरिया ‘बि’ को उत्कृष्ट शाखा बन्दै जेसीज अफ द मन्थको अवार्ड प्राप्त गर्न सफल भएको छ ।
नेपाल जेसीजले विहिवार सार्वजनिक गरेको जेसीज अफ द मन्थको अवार्ड अन्तर्गत एरिया ‘बि’ का ३३ वटा शाखालाई पछि पार्दै म्याग्दी जेसीजले नोभेम्बर महिनाको जेसीज अफ द मन्थको अवार्ड प्राप्त गरेको हो । म्यागदी जेसीजले विगत १८ वर्षदेखि सञ्चालन गर्दै आएको जेसीज कप यसै सातामात्र सम्पन्न गरेको थियो । जुन यस जिल्लाकै प्रतिष्ठित खेलको रुपमा प्रख्यात छ । जिल्लाका २० वटा उत्कृष्ट विद्यालयहरु सहभागि प्रतियोगिता यस जिल्लाकै एउटा ब्राण्ड बनेको छ । गत साल पनि यहि प्रतियोगितालाई आधार मान्दै नेपाल जेसीजले डिसेम्बर महिनाको अवार्ड प्रदान गरेको थियो ।
शाखाले हरेक महिना गरेको कार्यसम्पादनको आधारमा निरुपित उपाध्यक्ष र निरुपित कार्यकारीणी उपाध्यक्षले नेपाल जेसीजमा बुझाएको रिर्पाेटको आधारमा एउटा शाखाले यो अवार्ड प्राप्त गर्छ । अवार्ड प्राप्त गरेपछि शाखाका अध्यक्ष खमबहादुर थापाले खुसी व्यक्त गर्दै यो अवार्डले शाखालाई अझ हौसला प्राप्त गरेको बताउनु भयो । उहाँले यो अवार्ड प्राप्त गर्नका लागि योगदान गर्ने शाखाका पूर्व अध्यक्षहरु, बोर्डका पदाधिकारीहरुलाई धन्यवाद व्यक्त गर्दै नेपाल जेसीज परिवारलाई आभार व्यक्त गर्नु भयो ।
