म्याड्रिड — स्पेनी ला लिगामा रियल म्याड्रिडले शनिबार रातिका खेलपछि शीर्ष स्थानमा बार्सिलोनासँग बराबरी गरेको छ । नयाँ वर्षको विश्रामपछि फेरि सुरु भएको लिगमा रियलले गेटाफेलाई ३–० ले हरायो ।
त्यसमा राफल भराने र लुका मोडरिचले गोल गरे । अर्को गोल आत्मघाती रह्यो । बार्सिलोनामा भने इस्पनयोलको हातबाट २–२ को बराबरीमा रोकियो ।
वे लीले खेल सकिन दुई मिनेट अगाडि इस्पनयोलका लागि गोल गरेपछि बार्सिलोना बराबरीमा चित्त बुझाउन बाध्य रह्यो । त्यस अगाडि उसका लागि लुइस स्वारेज र आरटुरो भिडालले गोल गरेका थिए ।
इस्पनयोलले डेविड लोपेजको गोलमा सुरुमै अग्रता लिएको थियो । अब बार्सिलोना र रियल दुवैको १९ खेलबाट समान ४० अंक भएको छ । बार्सिलोना गोल अन्तरले अगाडि छ ।
यस्तै अर्को खेलमा एटलेटिको म्याड्रिडले लेभान्टेलाई २–१ ले हरायो र ३५ अंकमा तेस्रो स्थानमा रह्यो ।
