विराटनगर । विराटनगरको एक धार्मिक विद्यालयका प्रध्यानाध्यापक (मौलवी)लाई दुई छात्रामाथि यौन दुब्र्यवहार गरेको आरोप लागेको छ ।
विराटनगर–८ अशोक चोकमा रहेको ‘मदर्सा रजाए मुस्तफा आधारभूत विद्यालयका’ मौलवी करिब ४० वर्षीय अमरुद्धिन मियालाई यौन दुब्र्ययवहारको आरोप लागेको हो । मंगलबार र बुधबार १३ र १४ वर्षका दुई बालिकाले यौन दुब्र्यवहार गरेको किटानी जाहेरी दिएपछि मिया भने फरार छन् । अभिभावकको सहयोगमा दुई बालिकाले बिहीबार जिल्ला प्रहरी कार्यालय मोरङमा किटानी जाहेरी दिएका छन् ।
जाहेरीपछि मियाँलाई खोज्न प्रहरी पुगेको थियो । तर मियाँ भने घर छाडेर भागेका हुन् । बालिकाको उजुरी परेपछि मौलवीको खोजी सुरु गरेको जिल्ला प्रहरी कार्यालय मोरङका प्रवक्ता प्रहरी नायव उपरीक्षक लोकदर्शन थापाले जानकारी दिए ।
मुस्लिम धर्मग्रन्थ पढाइ हुने सो मदर्सामा बिहान मात्र कक्षा सञ्चालन हुन्छ । मंगलबार मौलवीले दिएको होमवर्क देखाउन बुधबार बिहान अफिस गएकी बालिकालाई मियाले जवरजस्ती करणीको प्रयास गरेका थिए ।
कार्यकक्षमा एक्लै बनाए मौलवीले संवेदनशील अंगमा छोएर कपडा खोल्न खोजेपछि बालिकाले प्रतीकार गरेकी थिइन् । घटना घरमा सुनाए बुबा–आमाको बद्नाम गर्ने डर देखाएपछि बालिकाले घटना सुनाएकी थिइनन् । तर बिहीबार बिहान मदर्सा नगएपछि सोधीखोजी गर्दा उनले परिवारमा घटना सुनाएकी हुन् । छोरीमाथिको दुब्र्यवहार भएपछि परिवारले स्थानीयको सहयोगमा जिल्ला प्रहरी कार्यालयमा किटानी जाहेरी दिएका छन् ।
१३ वर्षीया बालिकाले जाहेरी दिएपछि १४ वर्षीया बालिकाले पनि मंगलबार आफूलाई यौन दुब्र्यवहार गरेको भन्दै जाहेरी दिएकी छन् । एक व्यक्तिविरुद्ध २ जनाको जाहेरी परेपछि अनुसन्धान सुरु गरिएको प्रहरीले जनाएको छ । प्रहरीका अनुसार दुवै बालिका कक्षा पाँचमा पढ्छन् ।
