पुस्कर खड्का रामेछाप
अोखलढुङ्गा चम्पादेवी गाउँपालिका वडा नं. ५ फेदिगुठको बरुवाल डाँडा भन्ने स्थानमा आज विहान बोलेरो दुर्घटना भएको छ । बोलेरो दुर्घटना हुदा बोलेरोमा सवार १ जनाको घटनास्थलमा ज्यान गएको छ भने तीन जनाको अबस्था गम्भिर रहेको छ । दुर्घटनामा परि चम्पादेवी गाउँपालिका वडा नं. ५ बासबोटेका अन्दाजी वर्ष ५६ का सन्तोष विकको घटनास्थलमा नै ज्यान गएको छ ।
दुर्घटनामा परि चम्पादेवी ५ कै मृतक सन्तोषका छोरी वर्ष २५ की कमला विक, अन्दाजी वर्ष २० की अनिता बुढाथोकी र बोलेरोका साहू वर्ष ४० का खत्री काईला भनिने जीत बहादुर खत्री गम्भिर घाईते भएका छन् । बोलेरोका सहचालक किरण बुढाथोकी पनि सामान्य घाईते भएको चम्पादेवी गाउँपालिका वडा नं. ५ का कार्यबाहक वडा अध्यक्ष चन्द्र बहादुर कार्कीले जानकारी दिनुभयो ।
फेदीगुठ ओखलढुङ्गा सडकखण्डमा चल्ने बा २१ च ७३६१ नम्बरको बोलेरो ब्रेकफेल भएर दुर्घटना भएको उहाँले बताउनुभयो । घटनास्थलमा अहिले प्रहरी चौकी चुप्लु घोराखोरी र प्रहरीचौकी कोषहाटको टोली घटनास्थलमा पुगेको जिल्ला प्रहरी कार्यालय ओखलढुङ्गाले जनाएको छ । घाईते भएका तिनैजनाको अबस्था गम्भिर रहेको र उनिहरुलाई उपचारका लागि काठमाण्डौं पठाइएको ओखलढुङ्गा जिल्ला प्रहरी प्रमुख प्रहरी नायव उपरिक्षक रुपेश खड्काले जानकारी दिनुभयो । घटनाको विषयमा अध्ययन भैरहेको पनि जिल्ला प्रहरी कार्यालय ओखलढुङ्गाले जनाएको छ ।
