बाहुण्डाँगी । धनगढी लेडी जेसीजले वर्ष २०२० को पहिलो महिनामा नै उत्कृष्ट शाखा अवार्ड पाउन सफल भएको छ ।
नेपाल जेसीजले प्रदान गर्ने जेसीज अफ द मन्थको अवार्ड अन्तर्गत धनगढी लेडीले एरिया डि बाट जनवरी महिनाको अवार्ड जित्न सफल भएको हो ।
नेपाल जेसीजले मंगलवार साँझ सार्वजनिक गरेको पहिलो महिनाको अवार्डमा कार्य सम्पादनको आधारमा ४९ वटा शाखालाई पछि पार्दै धनगढी लेडीले जेसीज अफ द मन्थको अवार्ड जित्न सफल भएको हो ।
‘यो अवार्डले अझ उर्जा मिलेको छ’ धनगढी लेडी जेसीजकी २०२० की अध्यक्ष लक्ष्मी शाही चन्दले भन्नु भयो–‘आगामी दिनमा अझ प्रभावकारी रुपमा कामहरु गर्दै युवाहरुको व्यक्तित्व र नेतृत्वका क्षेत्रमा काम गर्ने छौँ ।’
अध्यक्ष शाहीले नेपाल जेसीजका राष्ट्रिय अध्यक्ष जेसीआई सिनेटर अशोक शंकर, निरुपित कार्यकारीणी उपाध्यक्ष शोभा खरेल र निरुपित उपाध्यक्ष राकेश गुरुङप्रति आभार प्रकट गर्दै यो अवस्थासम्म ल्याउनका लागि अहोरात्र लागि पर्ने शाखाका पदाधिकारीहरु तथा पूर्व अध्यक्षहरुलाई धन्यवाद व्यक्त गर्नु भयो ।
धनगढी लेडी जेसीजको नेतृत्व सम्हाल्नु भएकी शाहीले जनवरी महिनामा पर्यटन वर्ष विषेश कार्यक्रम, ट्राफिक सचेतना, आँखा शिविर, कपडा वितरण लगायतका कार्यक्रमहरु सम्पन्न गरेका थिए ।
