बिर्तामोड– साथी साथीबीच रक्सीको नसामा कुटाकुट हुँदा चारपानेका सुभान सेखले ज्यान गुमाएको झापा प्रहरीको अनुसन्धानले देखाएको छ । आपसी विवादका क्रममा उनका दुई साथीले सेखमाथि आक्रमण गरेको अनुसन्धानका क्रममा खुलेको हो । जिल्ला प्रहरी कार्यालय झापाले शुक्रवार बिर्तामोडमा पत्रकार सम्मेलन गरी सेख हत्यामा उनका दुई जना साथीको संलग्नता देखिएको भन्दै उनीहरुलाई सार्वजनिक गरेको छ ।
सेखको हत्या लगत्तै परिवारका सदस्यमाथि अनुसन्धान केन्द्रीत गरेको प्रहरीले उनका दुई जना साथीलाई घटनाको भोलिपल्ट पक्राउ गरेको थियो । पक्राउ पर्नेमा बिर्तामोड–२ का करण चौधरी र लक्ष्मण चौधरी छन् । सेखसहित उनीहरुले चारपानेमा बुद्धिमाया राईले सञ्चालन गरेको होटलमा मदिरा सेवन गरेका थिए ।
सेखले आफूहरुलाई मनपरी गाली गरेपछि कुटाकुट भएको पक्राउ परेका दुई आरोपीले प्रहरीलाई बयान दिएको झापा प्रहरीका प्रमुख एसपी कृष्णप्रसाद कोइरालाले बताए । ‘आपसी विवादपछि उनीहरु दुबै घरतर्फ लागेकोमा फेरि फर्किएर आक्रमण गरेको देखिन्छ’, एसपी कोइरालाले भने । सुरुमा ढुङ्गाले टाउकोमा हानेर बेहोस बनाएपछि घिसार्दै लगेर फेरि अर्काे पटक पनि ढुङ्गाले टाउकोमा हानेर चक्कुले शेखको संवेदनशील अंग काटी हत्या गरेको खुलेको कोइरालाले बताए ।
अचेत अवस्थाका रहेका सेखको यौनाङ्ग काटेर छुट्याएपछि अभियुक्तले स्थानीय ऐनकुमार राजवंशीको खेतको बीचमा रहेको परालको कुन्युमा लगेर फ्याँकेका थिए । लगत्तै उनीहरुले कुन्युमा आगो लगाएर सेखको हत्या गरेको प्रहरीले जनाएको छ । घटनाको भोलिपल्ट पनि उनीहरुले तीन पटकसम्म अलि टाढाबाट घटनास्थल हेरेको प्रहरीलाई बयान दिएका छन् । चारपाने चोकदेखि दुई सय मिटर दक्षिणमा जलेको अवस्थामा सेखको शव भेटिएको थियो ।
