२०७६ फागुन ९ गते
काठमाडौं । ठूला तहका कर्मचारीले घूस लिन आफ्ना सवारी चालकलाई प्रयोग गर्न थालेको देखेपछि अख्तियार दुरुपयोग अनुसन्धान आयोग गम्भीर भएको छ ।
केही दिन यता अख्तियारले सवारी चालकमाथि ध्यान केन्द्रीत गरेको छ ।
विद्युत प्राधिकरणका इन्जिनियर शेरबहादुर सुनुवार ७५ हजार रुपैयाँ घूस लिएको अभियोगमा अख्तियारको फन्दामा परेका छन् । उनी आफैंले घूस रकम थापेका थिएनन् । उनले आफ्ना सवारी चालकलाई प्रयोग गरेका थिए ।
अख्तियारले पहिले टेकबहादुर खड्कालाई कमलामाई नगरपालिकामा रंगेहात पक्रियो । विद्युत प्राधिकरणको कार्यालय भवनको तला थप गर्ने ठेक्का लिएका ठेकेदारलाई कार्यालयले दिनुपर्ने रकम दिन सहायक प्रबन्धक शेरबहादुरले आनाकानी गरेका थिए । त्यसपछि उनले ठेकेदारलाई ७५ हजार रुपैयाँ घूस दिन वाध्य बनाए । घूस रकम थाप्न सवारी चालक टेकबहादुर गएका थिए । रकम लिँदालिँदै उनी समातिए ।
टेकबहादुरले हाकिम साब उर्फ शेरबहादुरले लिन पठाएको वयान दिए । त्यसपछि शेरबहादुरलाई अख्तियारले पक्रियो । शेरबहादुर इन्जिनियर हुन् तथा प्राधिकरण सिन्धुलीका सहायक प्रबन्धक पदमा कार्यरत थिए ।
उता चन्द्रागिरी नगरपालिकाका प्रशासकीय अधिकृत युवराज पौडेल पनि एक लाख रुपैयाँ घूस लिएको अभियोगमा पक्राउ परेका छन् । उनले पनि घूस लिन आफ्ना सवारी चालकलाई प्रयोग गरेका थिए ।
चन्द्रागिरी नगरपालिकाले एक मिडिया कम्पनीलाई दिनुपर्ने रकममा घूस मागेका थिए युवराजले । उनले पनि आफ्ना सवारी चालकलाई घूस लिन पठाएका थिए । सवारी चालक पक्राउ परेपछि युवराजको पोल खुल्यो र उनी पनि पक्राउ परेका हुन् ।
