काठमाडौं, ९ फागुन । कमल थापा नेतृत्वको राष्ट्रिय प्रजातन्त्र पार्टी (राप्रपा) र पशुपति शम्शेर राणा नेतृत्वको राष्ट्रिय प्रजातन्त्र पार्टी (संयुक्त) वीचको पार्टी एकीकरण चुनाव चिन्हले विथोलेको छ ।
राप्रपाको चुनाव चिन्हका विषयमा पनि सहमति हुन नसक्दा एकता रोकिएको नेताहरुले बताउने गरेका छन् ।
कमल थापा नेतृत्वको राप्रपाका नेताहरूले चुनाव चिन्ह ‘गाई’ लाई बनाउन दबाब दिँदै आएका छन् ।
पशुपतिशम्शेर राणा नेतृत्वको राप्रपा (संयुक्त) का नेताहरूले चुनाव चिन्ह ‘हलो’ राख्न दबाब दिने गरेका छन् ।
तर, दुबै पक्षले चुनाव चिन्हको विषय महाधिवेशन अगाडि नै शीर्ष नेतृत्वले मिलाउनुपर्ने पक्षमा लचकता देखाए पनि मिल्न नसक्दा एकता भाडिएको स्रोतहरुले उल्लेख गरेका छन् ।
कसले नेतृत्व हत्याउने भन्ने कुरा नमिल्दा एकता रोकिएको नेताहरु बताउँछन् । एकीकरणपछि राप्रपाको नेतृत्व अर्थात अध्यक्षमा कमल थापा, पशुपति शम्शेर राणा र डा.प्रकाशचन्द्र लोहनीलाई बनाउने तयारी भएको छ ।
त्यसमा कार्यकारी को हुने भन्नेमा लफडा रहेको बताइन्छ । कुरा मिल्ने सम्भावना न्यून भएपछि राप्रपा (संयुक्त) का अध्यक्ष पशुपति शमशेर राणा भारतको राजधानी नयाँदिल्ली प्रस्थान गरेका छन् ।
राप्रपाका अध्यक्ष कमल थापा फागुन ४ गतेदेखि १८ गतेसम्म पार्टी संगठन सुदृढीकरण तथा बिस्तारको लागि देश दौडाहामा जाँदै छन् ।
सांगठनिक रुपमा कमल थापा नेतृत्वको राप्रपा पशुपति शम्शेर राणाको राप्रपा (संयुक्त) भन्दा बलियो रहेको चर्चा छ ।
कमल थापाले पार्टी एकीकरणका विषयमा त्यसलाई आधार बनाएर आफू हाबी हुन खोजेपछि राप्रपा (संयुक्त)का नेताहरू शसंकित बनने गरेका छन् । अभियान टाइम्सका साथमा ।
