धादिङ, १६ फागुन । बेनीघाट रोराङ–५ चरौंदी पुलमा जन्ती बोकेको बस दुर्घटना हुँदा ६ जना घाइते भएका छन् । जन्ती बोकेर काठमाडौंबाट स्याङजातर्फ जाँदै गरेको बा १ प ८९२ नम्बरको पर्यटक बोक्ने बस बा १ घ ६३० नम्बरको ट्रक र बा ८ ख ९४९२ नम्बरको जन्ती बोकेको डिलक्स बस एकापसमा ठोक्किंदा दुर्घटना भएको हो ।
दुर्घटनामा घाइतेमध्ये ४ जनालाई भरतपुर अस्पताल पठाइएको तथा २ जनाको मलेखुस्थित राजमार्ग सामुदायिक अस्पतालमा उपचार भइरहेको इलाका प्रहरी कार्यालय गजुरीले जानकारी दिएको छ ।
प्रत्यक्षदर्शी शिक्षक तिलक चेपाङका अनुसार दुवैतर्फका सवारी साधनहरु पुलमा कोचाकोच भएपछि दुर्घटनाको अवस्था सिर्जना भएको हो ।
तीनवटै सवारी चालकहरुलाई गजुरी प्रहरीले नियन्त्रणमा लिएको छ ।
