माघ ७ – आर्सनलले इंग्लिस प्रिमियलर लिगमा लगातार तीन खेलको जित बिहीन यात्रा टुंग्याएको छ । लिग अन्तर्गत शनिबार राति भएको खेलमा आर्सेन वेङ्गरको टिम आर्सनलले क्रिष्टल प्यालेसलाई ४–१ ले हराएर जित बिहीन यात्राको शृङ्खला रोकेको हो । 
घरेलु मैदानमा भएको खेलमा आर्सनलले चारै गोल पहिलो हाफमा गरेको हो, त्यो पनि २२ मिनेट भित्रमा । छैटौँ मिनेटमा नाचो मोनरियलले गोल गर्दै टिमलाई सुरुवाति अग्रता दिलाए । १० औँ मिनेटमा इवोबीले गोल गर्दै अग्रता दोब्बर पारे ।
१३ औँ मिनेटमा लोरेन्ट कोशिएल्नी तथा २२ औँ मिनेटमा एलेक्सान्ड्र लाकाजेटीले गोल गरेपछि आर्सनलले पहिलो हाफमा ४–० को अग्रता लियो । ७८ औँ मिनेटमा मिलिवोजेविकले क्रिष्टल प्यालेसका लागि एक गोल फर्काए पछि आर्सनल ४–१ ले विजयी भयो ।
जितपछि छैटौँ स्थानको आर्सनलको २४ खेलबाट ४२ अंक भएको छ । उ पाँचौँ स्थानको टोटनह्याम भन्दा दुई अंकले पछि रहेको छ । 
राति नै भएका अरु खेलमा लेस्टर सिटीले वाट्फोर्ड तथा स्टोक सिटीले हडर्ल्सफिल्डलाई समान २–० ले हरायो । यस्तै वेष्ट ह्याम र बोर्नमाउथ तथा एभर्टन र वेष्ट ब्रोमले १–१ को बराबरी खेल्दै अंक बाँडेका छन् ।
