इटहरी। प्रतियोगिताको दावेदार मध्ये एक मनाङ मस्र्याङ्दी क्लबले रमपम झापा–११ लाई रोमाञ्चक प्रतिस्पर्धामा हराउँदै मदन भण्डरी स्मृति इटहरी गोल्डकपको सेमिफाइनलमा प्रवेश गरेको छ । इटहरी रंगशालामा आइतबार सम्पन्न खेलमा मनाङले झापाविरुद्ध ४–३ को रोमाञ्चक जित निकाल्यो ।
मनाङको जितमा सुजल श्रेष्ठले ह्याट्रिक गरे भने बिशाल राईले थप एक गोल गरे । उता पराजित झापाका लागि कर्ण लिम्बु एक्लैले ३ गोल गर्दै ह्याट्रिक पूरा गरे । यद्यपि उनले झापाको हार भने टार्न सकेनन् । आइतबारको खेलमा मनाङका लागि ह्याट्रिक गरेको सुजल श्रेष्ठ म्यान अफ द म्याच घोषित भए ।
प्रतियोगिता अन्तरगत सोमबारको खेल नेपाल आर्मी क्लब र डु«क स्टार क्लब, भुटानबीच हुने आयोजकले जनाएको छ । राष्ट्रिय जागृति क्लब, इटहरीको आयोजनामा जारी प्रतियोगितामा राष्ट्रिय तथा अन्तर्राष्ट्रिय गरी कुल ८ टोलीहरुको सहभागिता रहेको छ । प्रतियोगिताको फाइनल खेल माघ १३ गते हुनेछ भने विजेताले उपाधिसहित नगद १२ लाख हात पार्नेछ ।
