फागुन २५, काठमाडौं । विभिन्न कामले चर्चामा आइरहने पूर्वयुवराज पारस शाह एक पटक फेरी चर्चामा आएका छन् । शनिबार उनी धेरैको ध्यान तान्ने हुलियामा पशुपतिनाथ परिसरमा देखिए ।
लामो कपालमा देखिनु स्वाभाविक हो जुन उनको पुरानै हुलिया हो तर, शनिबार उनले पछ्यौरा ओढे । सिमसिम पानी परिरहेका बेला त्यहि हुलियामा गाडी चढेर पशुपतिनाथ मन्दिर परिसर पुगेका पारस शाह सरसफाइ कार्यक्रममा समेत सरिक भए ।
सरसफाइ अभियान्ता केपी खनालको निम्तो स्वीकारेर पूर्वयुवराज शाह पशुपतिनाथ मन्दिर पुगेका हुन् । सुरूमा खनालले नै पारसलाई माला लगाइदिएर स्वागत गरे । सो क्रममा पूर्वयुवराज पारसले पनि कुचो समातेर बढारेका थिए ।
पछ्यौरा ओढेर झाडुले सफाइ गरिरहेको फोटो सामाजिक सञ्जालमा भाइरल बनेको छ । उनले सफाइ टोलीसँग केही समय बिताएका थिए ।
