चीनबाट सुरु भएको कोरोना भाइरस (कोभिड–१९) विश्वभर संक्रमण बढेसँगै चार जना नेपालीलाई कोरोना भाइरस संक्रमणको पुष्टि भएको छ ।
विदेशमा रहेका तीन र विदेशबाट नेपाल भित्रिएका एक नेपालीमा कोरोना संक्रमणको पुष्टि भएको हो ।
यूएईमा रहेका दुई, अस्ट्रेलियामा रहेका एक र चीनबाट फर्किएका एक नेपालीलाई कोरोना संक्रमण भएको सम्बद्ध अधिकारीहरू बताउँछन् । यूएईमा रहेको स्वास्थ्य मन्त्रालयले हिजो सोमबार सार्वजनिक गरेको प्रतिवेदनअनुसार दुई नेपालीसहित नयाँ थप १४ जनामा कोरोना संक्रमण भेटिएको हो ।
नयाँ संक्रमितमध्ये दुई नेपाली, ४ यूएईका, दुई बंगाली, एक रसियन, एक भारतीय र एक सिरियाली रहेको गल्फ टुडेले जनाएको छ । यूएईमा कोरोना संक्रमित संख्या ५९ पुगेको गल्फ टुडेमा उल्लेख छ ।
यस्तै, नेपालबाट सिंगापुर ट्रान्जिट भएर १४ फागुनमा अस्ट्रेलिया पुगेका एक नेपालीमा कोरोना पोजेटिभ देखिएको थियो । आइसोलेसन वार्ड तयारी अवस्थामा राखिएको स्वास्थ्य तथा जनसंख्या मन्त्रालयले जनाएको छ ।
