उर्लाबारी, ११ माघ । मोरङको उर्लाबारीमा जारी प्रथम मेयर कप फुटवल प्रतियोगिताको उपाधिका लागि वडा नम्बर ५ र ७ भिड्ने भएका छन् ।
उर्लाबारी – ३ स्थित चाईनिज क्याम्प खेल मैदानमा आज भएको दोश्रो तथा अन्तिम सेमिफाईनल खेलमा वडा नम्बर ९ लाई २ – १ गोल अन्तरले हराउँदै वडा नम्बर ७ ले उपाधिका लागि वडा नम्बर ५ सँगको भेट पक्का गरेको हो ।
यसअघि हिजो भएको पहिलो सेमिफाईनल खेलमा डिफेण्डिङ च्याम्पियन समेत रहेको वडा नम्बर ५ ले छिमेकी वडा ६ लाई ३ – ० गोल अन्तरले हराउँदै फाईनलमा पुगेको थियो । आजको खेलमा वडा नम्बर ७ लाई विजयी गराउन बिबेक ठकुरी र सुरेश राईले एक÷एक गोल गरेका थिए । वडा नम्बर ९ का लागि भने सुहाङ लिम्बुले सान्त्वना गोल फर्काएका थिए । फाईनल भिडन्त पर्सी शनिवार हुनेछ ।
प्रतियोगिता उर्लाबारी फुटवल क्लबको आयोजना तथा उर्लाबारी नगरपालिकाको मुख्य सहयोग र नगर खेलकुद विकाश समितिको प्राविधिक सहयोगमा भएको हो । प्रतियोगिताको उपाधि विजेताले ७५ हजार तथा उपविजेताले ५० हजार नगदसहित ट्रफि, मेडल र प्रमाणपत्र प्राप्त गर्ने आयोजक क्लबका सचिव भिष्म बुढाथोकीले जानकारी दिनुभयो ।
