झापा, माघ १२ । गायक शिव परियारको आवाजमा रहेको गीत ‘चारैतिर’को म्युजिक भिडियो शुक्रबार सार्वजनिक गरिएको छ । भिडियोलाई सेल्फी मिडिया प्रालि युट्युब च्यानलले सार्वजनिक गरेको हो ।
गीतमा विमल गौतमको शब्द तथा राम सिटौलको संगीत रहेको छ । म्युजिक भिडियोलाई झापामा छायाङ्कन गरिएको हो । पछिल्लो समय म्युजिक भिडियोमा ख्याति कमाउँदै गरेका निर्देशक सुन्दर लावतीको एक्सन कटमा तयार पारिएको छ । भिडियोमा सञ्चारकर्मी रमेश तिवारी र गायिका तथा मोडल जुनु प्रसाईले अभिनय गरेका छन् ।
गीत आफैँमा राम्रो भएकाले यसको म्युजिक भिडियोबाट राम्रो आशा गरेको गायक परियारले बताए । पूर्वमा राम्रो म्युजिक भिडियो निर्माण हुने क्रम बढ्दै गएकाले ‘चारैतिर’को छायाङ्कन झापामा गरिएको संगीतकार सिटौलाको भनाइ छ ।
म्युजिक भिडियोमा सकेसम्म मिहेनत गरेकाले सबैले मन पराउने आशा लिएको निर्देशक लावतीले बताए । भिडियोलाईअर्जुन सापकोटाले छायाङ्कन तथा अर्जुन पोख्रेलले सम्पादन गरेका छन् ।
