भरतपुर । कोरोना भाइरसको रोकथामका लागि सरकारले लकडाउन जारी गरेपछि चैतयताका कुनै पनि सांस्कृतिक पर्व तथा चाडपर्व पूर्णरूपमा प्रभावित भएको छ। केही दिनअघि चैते दसैँ मनाउन नपाएका हामीले यसवर्ष बैशाख पूर्णिमा पनि मनाउन नपाइने भएको छ। तर, धुमधामसँग पर्व नमनाए पनि आ–आफ्नो घरमा पूजापाठ गर्न भने सरकारले बन्देज लगाएको छैन।
त्यसैले यसवर्षको २५६४औँ बुद्ध जयन्ती पर्व पनि पूजापाठमै सीमित हुने भएको छ। चितवनमा पनि महाबौद्ध गुम्बामा हरेक वर्ष धुमधामका साथ बुद्ध जयन्ती मनाउँदै आइएको थियो। तर, यसवर्ष यहाँ पनि सामान्य पूजापाठमै पर्व सीमित हुने गुम्बाकी अध्यक्ष विमला गुरूङले जानकारी दिइन्।
गुम्बामा भेला भएर धुमधामका साथ बुद्ध जयन्ती मनाउन नपाए पनि आ–आफ्नै घरमा पूजापाठ गरेर पर्व मनाउन जिल्लावासी बौद्ध धर्मावलम्बीहरूलाई आग्रह गरेकी छन्। बुद्ध जयन्ती मनाउने वातावरण नभए पनि बुद्ध टोलको अगुवाइमा गुम्बा परिसरमा नियमित सरसफाइ गर्दै आइरहेको छ। यसवर्ष यही बैशाख २५ गते बुद्ध जयन्ती परेको थियो।
