चीन र भारतबीच केही महिनायता मडारिएको युद्धको अवस्थालाई अन्त्य गर्दै डोक्लाम विवाद समाधान गर्ने सहमति गरेका छन् ।
भारतीय सञ्चारमाध्यमका अनुसार दुई देशबीच डोक्लाम क्षेत्रमा तैनाथ गरिएका दुबै देशका सेना फिर्ता लिने सहमति भएको छ । भारतीय विदेश मन्त्रालयले डोक्लाम क्षेत्रमा तैनाथ गरिएका सेना फिर्ता बोलाउने प्रक्रिया समेत सुरु भइसकेको जनाएको छ ।
यस्तै चिनियाँ सञ्चारमाध्यमले पनि दुई देशबीचको विवाद अन्त गर्ने सहमति भएको जनाएका छन् । दुबै देशले शान्तिपूर्ण रुपमा संवादबाट समस्याको समाधान गर्ने जनाएका छन् ।
डोक्लाम क्षेत्रमा चीनले सडक निर्माणका साथै भौतिक संरचना निर्माणलाई तीब्रता दिएपछि भारतले हस्तक्षेप गर्दै सेना परिचालन गरेको थियो ।
केही साता अघि दुई देशका सेनाबीच ढुंगा हानाहान समेत भएको थियो । भारत र चीनले डोक्लम विवादलाई आफ्नो प्रतिष्ठाको विषय बनाउँदै एकले अर्को देशलाई चेतावनीपूर्ण बक्तव्यबाजी समेत गर्दै आएका थिए ।
