उर्लाबारी । कोभिड–१९ को नियन्त्रण एवं रोकथामका लागि सरकारले घोषणा गरेको बन्दाबन्दीको अवधिमा तलब–सुविधा नपाएको भन्दै मोरङको उर्लाबारीका निजी विद्यालयका शिक्षक–कर्मचारी आन्दोलित भएका छन् ।
उर्लाबारी क्षेत्रका निजी विद्यालयका शिक्षक–कर्मचारीहरुले आज प्याब्सन उर्लाबारी नगरसमिति र उर्लाबारी नगरपालिकालाई ज्ञापनपत्र बुझाउँदै तलब सुविधा उपलब्ध गराउन माग गरेका हुन् । माघ महिनादेखिकै रकम पाउन नसकेको भन्दै उनीहरुले गुनासाे गरेका छन् । विद्यालयहरुले अनलाइन शिक्षालगायतका नाममा शिक्षकहरुलाई काममा खटाइरहेको अवस्थामा पनि तलब सुविधा भने नदिएको उनीहरुको आरोप छ ।
निजी विद्यालयका शिक्षक रमेश विष्टले बन्दाबन्दी सुरु भएयता आफूहरुले तलब नपाएको बताउनुभयो । हामीले तलब पाएका छैनौँ, उहाँले भन्नुभयो, पटक–पटक माग गरे पनि कहीँकतैबाट सुनुवाइ भएको छैन, बाध्य भएर आन्दोलन उत्रिएका हौँ ।’
