आपसी विवाद भएपछि साथीको हत्या गर्ने एकजनालाई प्रहरीले पक्राउ गरेको छ। पक्राउ पर्नेमा खोटाङ चिसापानी- ९ का प्रेम खड्का भन्ने राजन कटुवाल रहेको महानगरीय अपराध महाशाखा टेकुले जनाएको छ। उनले सिन्धुलीगढी घर बताउने ज्यामी काम गर्दै आएका सानु मगरको माघ २४ गते काठमाडौं कागेश्वरी मनोहरा नगरपालिका- ९ मूलपानी क्रिकेट मैदान नजिकै सडकमा ढुंगाले हानेर हत्या गरेका थिए। उनीहरू एक महिना पहिलेमात्र एकअर्कासँग परिचित भएका र सँगै ज्यामी काम गर्दै अाएका प्रहरीले बताएको छ। आपसी विवादका कारण हत्या गरेको महानगरीय अपराध महाशाखा टेकुले जानकारी दिएको छ। कटुवाललाई कानुनी कारवाहीका लागि महानगरीय प्रहरी वृत्त बौद्ध पठाइएको महाशाखाले जानकारी दिएको छ।
