बिर्तामोड- इलामबाट झापा आएका ३ जना सशस्त्र प्रहरीमा कोरोना भाइरसको संक्रमण देखिएको छ । तालिमका लागि झापा आएका सशस्त्र प्रहरीमा कोरोना संक्रमण पुष्टि भएको हो ।
सशस्त्र प्रहरीको तालिम केन्द्र पाडाजुँगीमा उनीहरु केही दिनअघि मात्रै आएका थिए । यसअघि सीमावर्ती नाकामा खटिएका सशस्त्र प्रहरीका बीस जनामा कोरोना भाइरसको संक्रमण पुष्टि भएको थियो ।
बिहीबार संक्रमण पुष्टि भएका ४ जनामध्ये तीन जना सशस्त्र प्रहरी रहेको स्वास्थ्य कार्यालय झापाका फोकल पर्सन जीवन चाैलागाईले जानकारी दिए । सशस्त्र प्रहरीसहित कोरोना संक्रमित चारैजनालाई उपचारका लागि धरानस्थित बिपी कोइराला स्वास्थ्य विज्ञान प्रतिष्ठान पठाइएको छ ।
इलाममा कार्यरत सशस्त्र प्रहरी निरीक्षकमा कोरोना भाइरसको संक्रमण पुष्टि भएपछि बिर्तामोडमा पुनः अर्को त्रास थपिएको छ । झापाको बाहुनडाँगीमा सशस्त्र प्रहरी निरीक्षकको स्वाब संकलन गरिएको थियो ।
रिपोर्ट नआउँदै उनी विर्तामोडको पूर्वमा रहेको धर्मकाँटा छेउको घरमा बस्दै आएका थिए । बिहीबार अपरान्ह उनको रिपोर्ट पाेजेटिभ आएको स्वास्थ्य कार्यालय झापाका फोकल पर्सन चौलागाईंले जानकारी दिए ।
