एजेन्सी । च्याम्पियन्स लिगमा बार्सिलोना इतिहासकै खराब हारबाट गुज्रिएको छ । पोर्चुगलको लिस्बनमा भएको च्याम्पियन्स लिगको क्वाटरफाइनलमा पाँच पटकको च्याम्पियन्स लिग विजेता बार्सिलोना ८-२ गोलको फराकिलो अन्तरले पराजित भयो । यो हारसँगै बार्सिलोना यो सिजन उपाधि विहिन भएको छ ।
शुक्रबार लिस्बनमा बायर्नले उत्कृष्ट प्रदर्शनका साथ ८-२ को जित दर्ता गर्दै सेमिफाइनलमा स्थान पक्का गर्दा थोमस मुलर र बार्सिलोनाबाट लोनमा बार्यन गएका फिलिपे कोउटिन्हो नायक बने । पहिलो हाफमै ४ गोल गरेको बायर्नका लागि थोमस मुलर र फिलिपे कोउटिन्होले २-२ गोल गरे । जोशुआ किम्मिच, सर्ज जिनाब्री, रोबर्ट लेवान्डोस्की, र इभान पेरिसिचले १-१ गोल थपे । बार्सिलोनाका लागि लुइस सुआरेजले एक गोल गर्दा अर्को गोल उपहार पायो । बार्यनका डेविड अलाबाको आत्मघाती गोल पहिलो हापको छैटौं मिनेटमै बार्सिलोनाले पाएको थियो । पराजित सँगै बार्साका स्टार खेलाडी लियाेनल मेस्सी निराश भएका छन् ।
खेलको तेस्रो मिनेटमा नै बायर्नले अग्रता लिएकाे थियाे । रोबर्ट लेवान्डोस्की र थोमस मुलरले पेनाल्टी क्षेत्रभित्र एक अर्कासँग पास खेल्दै बनाएको मुभमा मुलरले गोल गरेका थिए ।
तर बायर्नको उक्त अग्रता ३ मिनेट पानी टिक्न सकेन । छैटौं मिनेटमा जोर्डी अल्बाले गरेको क्रसलाई क्लियर गर्ने क्रममा डेविड अलाबाको क्लियरेन्स आफ्नै पोस्टमा छिर्न पुग्यो । अल्बाले सुआरेजलाई लक्षित गर्दै दिएको लो क्रसमा अलाबाले राम्रो नियन्त्रण गर्न नसक्दा आफ्नो पोस्टतर्फ गएको बललाई गोलरक्षक नोएरले बचाउन सकेनन् ।
खेलको आठौं मिनेटमा लुइस सुआरेजले वन भर्सेस वनको स्थितिमा गरेको प्रहारलाई म्यानुएल नोएरले विफल पारे । त्यसपछि कर्नरमा बनेको मुभमा पोस्ट बाधक बन्दा बार्सिलोना अग्रता लिनबाट चुक्यो । मेस्सीको क्रसमा सर्जियो बुस्केट्सले राम्रोसँग हेडर गर्न नसक्दा बार्सिलोनाको ४ खेलाडीलाई बिट गर्दै बल पोस्टमा लागेर फर्कियो ।
खेलको २० औं मिनेटमा लिओनेल मेस्सीले दुई डिफेन्डरलाई छलाउँदै पेनाल्टी क्षेत्रभित्रबाट गरेको प्रहार गोलरक्षक नोएरले सहजै बचाए । त्यसको एक मिनेट नबित्दै अर्कोतर्फ आक्रमण बुनेको बायर्नले पुनस् अग्रता बनायो । इभान पेरिसिचले सर्ज जिनाब्रीको पासलाई पेनाल्टी क्षेत्रभित्र नियन्त्रणमा लिँदै गरेको प्रहार गोलमा परिणत भयो । गोलरक्षक टेर स्टेगनले सट बचाउने प्रयास गरेपनि उनको खुट्टामा लाग्दै बल पोस्टमा छिरेको थियो ।
२७ औं मिनेटमा बायर्नले अग्रता दोब्बर पार्यो । सर्ज जिनाब्रीले गोरेट्जकाको पासलाई सदुपयोग गर्दै पेनाल्टी क्षेत्र भित्रबाट उत्कृष्ट फिनिस गरेपछि बायर्नले ३-१ को अग्रता लियो । लगत्तै लेवान्डोस्कीले बार्सिलोनाको डिफेन्सको गल्तिमा वन भर्सेस वनको स्थिति हुँदापनि गोल गर्न सकेनन् ।
३१ औं मिनेटमा बायर्नले अर्को गोल थप्दै ४-१ को अग्रता बनायो । जोशुआ किम्मिचले दायाँ विंगबाट गरेको क्रसलाई मुलरले ६ यार्ड बक्सभित्रबाट पहिलो टचमा नै गोलरक्षक टेर स्टेगनलाई बिट गर्न सफल भए । ३९ औं मिनेटमा लेवान्डोस्कीको हेडरलाई टेर स्टेगनले सहजै बचाए ।
दोस्रो हाफमा बार्सिलोनाले मिडफिल्डर सर्जी रोबर्टोको स्थानमा फरवार्ड एन्टोइन ग्रिजमनलाई मैदान प्रवेश गरायो । तर बायर्नले पहिलो हाफकै लयलाई निरन्तरता दिँदै आक्रमण जारि राख्यो । ४९ औं मिनेटमा पेरिसिचले पेनाल्टी क्षेत्र बाहिरबाट गरेको प्रहारलाई टेर स्टेगनले बचाए । लगत्तै गोरेट्जकाले पेनाल्टी क्षेत्रभित्र लामो पासलाई शरीरले नियन्त्रणमा लिँदै गरेको प्रहार आकासियो ।
५२ औं मिनेटमा लेवान्डोस्कीले गोल गरेपनि पास दिएका मुलर अफसाइड भएकाले गोलले मान्यता पाएन । ५७ औं मिनेटमा लुइस सुआरेजले गोल गर्दै बार्सिलोना खेलमा फर्कने संकेत गरे । जोर्डी अल्बाको पासलाई पेनाल्टी क्षेत्रबाहिर नियन्त्रणमा लिएका सुआरेजले पेनाल्टी क्षेत्रभित्र बोटेङलाई बिट गर्दै गरेको प्रहार नोएरले बचाउन सकेनन् ।
खेलको ६३ औं मिनेटमा बायर्नले गोल गर्दै पुनस् ३ गोलको अग्रता कायम गर्यो । अल्फोन्सो डेभिसले बायाँ विङ्गमा बल नियन्त्रणमा लिँदै पेनाल्टी क्षेत्रभित्र अगाडि बढेर ६ यार्ड बक्सबाट दिएको कटब्याकमा किम्मिचले पहिलो टचमा गोल गर्दै ५(२ ले अगाडी बढाए । डेभिसले बायाँ विङ्गमा सेमेडोलाई छक्याएर बल अगाडी बढाउने क्रममा बार्सिलोनाको डिफेन्सले उनलाई रोक्न नसक्दा गोल सम्भव भएको थियो ।
६८ औं मिनेटमा बायर्नले अग्रता बनाउने अर्को अवसर पायो । मैदान प्रवेश गरेको दोस्रो मिनेटमा नै किंग्सले कोमानको प्रहारलाई अल्बाले गोल हुबाट बचाए । लगत्तै लेवान्डोस्कीको शक्तिशाली प्रहारलाई टेर स्टेगनले विफल पारे । ७६ औं मिनेटमा मेस्सीले पेनाल्टी क्षेत्र भित्रबाट गरेको प्रहारलाई नोएरले बचाए ।
८२ औं मिनेटमा फिलिपे कोउटिन्होको क्रसमा लेवान्डोस्कीले हेडरमार्फत गोल गर्दै बायर्नलाई ६-२ ले अगाडी बढाए । कोउटिन्होले पेनाल्टी क्षेत्रको बायाँबाट दिएको क्रसलाई अनमार्क रहेका लेवान्डोस्कीले जारि सिजन च्याम्पियन्स लिगको व्यक्तिगत १४ औं गोलमा परिणत गरेका थिए ।
८५ औं मिनेटमा फिलिपे कोउटिन्होले गोल गर्दै स्कोर ७-२ बनाए । मुलरले दिएको थ्रु पासलाई नियन्त्रणमा लिँदै कोउटिन्होले डिफेन्डरहरुको बीचबाट गरेको प्रहार टेर स्टेगनले बचाउन सकेनन् । ८९ औं मिनेटमा कोउटिन्होले व्यक्तिगत दोस्रो गोल गर्दै बायर्नको अग्रता थप फराकिलो पारे । पेनाल्टी क्षेत्रभित्रै लुकास हर्नान्डेजको हेडर पासलाई कोउटिन्होले सहजै नियन्त्रणमा लिँदै गोलमा परिणत गरेका थिए ।
बासिर्लाेना बार्यनका अगाडी निरिह बन्याे । बार्साका डिफेन्स र मिडफिल्ड चल्न नसक्दा स्ट्राइकर लियाेनल मेस्सी, लुइस सुवारेज चल्न सकेनन् । बायर्नसँगकाे खेलमा बार्साका गाेल रक्षक टेर स्टेगनकाे प्रदर्शन इतिहासकै कमजाेर भयाे । बार्सिलाेना याे सिजन उपाधि विहिन भएपछि बार्साका मेनेजर क्विके सेटिनकाे पद पनि धरापमा परेकाे छ ।
बायर्नले अब सेमिफाइनलमा म्यानचेस्टर सिटी र लियोनबीच खेलको विजेतासँग प्रतिस्पर्धा गर्नेछ । यसअघि पेरिस सेन्ट जर्मेन (पीएसजी) र आरबी लाइप्जिगले अन्तिम चारमा एक अर्कासँग भिडन्त पक्का गरिसकेका छन्
