२०७७ भदौ ११ बिहीबार
काँकडभिट्टा । गोरु काटेको बिषयबाट सुरु विवादले यहाँ एकजना युवकको ज्यान गएको छ । झापा गाउँपालिकामा बुधबार साँझ सशस्त्र प्रहरीले गोली चलाउँदा घाइते भएका स्थानीय रसिकुल आलमको बिर्तामोडको बीएण्डसी अस्पतालमा उपचार गर्दैगर्दा मृत्यु भएको हो । उनलाई पेटमा गोली लागेको थियो ।
ती युवा समेत उनका साथीहरुले गोरु काटेको भनेर स्थानीय बासिन्दाबीच विवाद भएपछि झापा गाउँपालिका–३ कामाटोली पुगेको सशस्त्र प्रहरीले गोली चलाउँदा आलम घाइते भएका थिए । विवादमा उत्रिएका दुइ समूहसँग छलफल गरेर समाधान हुनसक्ने बिषयमा प्रहरीले अनावश्यक रुपमा बल प्रयोग गर्दा ती युवकको ज्यान गएको बताईएको छ ।
नेपाली कांग्रेसका प्रवक्ता विश्वप्रकाश शर्माले गोली चलाउन नपर्ने अवस्थामा पनि अनावश्यक बल प्रयोग गर्नाले एक युवकको ज्यान गएको भनेर विरोध गरेका छन् ।
गोरु काटेको अभियोगमा प्रहरीले दिउँसो दुई जनालाई पक्राउ गरेको थियो । उनीहरुलाई जिल्ला प्रहरी कार्यालय लैजान खोजिएपछि स्थानीयबासी आक्रमणमा उत्रिएको झापा गाउँपालिकाका प्रमुख जय नारायण साहको भनाई छ ।
कामाटोली बजारमा गोरु काट्दै गरेको अवस्थामा दुई जना पक्राउ परेका थिए । पक्राउ पर्नेहरुमा झापा गाउँपालिका–३ का अब्दुल सलाम र ताजमल हक रहेका छन् ।
दिउँसो ताजमल हकको घरमा गोरु काट्दै गरेको अवस्थामा इलाका प्रहरी कार्यालय कुमरखोद र सशस्त्र प्रहरी बेस क्याम्प टाघनडुब्बाबाट गएको संयुक्त टोलीले मासुसहित ती दुवैलाई पक्राउ गरेको प्रहरीले जनाएको छ ।
गोरु काट्ने व्यक्तिहरुलाई हिरासतमा लिन खोज्दा स्थानीयले अवरोध गरेपछि प्रहरीले बल प्रयोग गरेको जिल्ला प्रहरी कार्यालयका प्रवक्ता प्रहरी नायब उपरीक्षक राकेश थापा बताउँछन् । उनले त्यसक्रममा केही राउण्ड हवाई फायर भएको पनि बताए ।
गिरफ्तारी पछि समर्थक र आफन्तले कामाटोली बजारमा टायर बालेर विरोध गरेका थिए ।
