काठमाण्डु, २६ माघ – सरकारले राष्ट्रिय सभामा तीन सदस्य मनोनयनका लागि राष्ट्रपति विद्यादेवी भण्डारीसमक्ष सिफारिस गरेको छ । संविधानको धारा ८६ को २ (ख) अनुसार शुक्रबार बसेको मन्त्रिपरिष्द बैठकले गोपाल बस्नेत, कृष्णप्रसाद पौडेल र चाँदनी जोशीलाई मनोनयनको सिफारिस गरेको हो ।
सरकारको यो मनोनयनसँगै राष्ट्रियसभाले पूर्णता पाउने भएको छ। सरकारको सिफारिस गरेका तीन जना मध्ये दुई कांग्रेसमा क्रियाशील रहेका नेता हुन् । जोशी कांग्रेस शुभेच्छुक हुन्। उनी सामाजिक क्षेत्रमा काम आबद्ध छन् । बस्नेत झापाका पुराना कांग्रेस नेता हुन् ।
उनी झापा जिल्ला कार्यसमितिका पूर्व सचिव समेत हुन् । ०५१ सालको मध्यावधि निर्वाचनमा पराजित भएपछि उनी क्रियाशील राजनीतिबाट सामाजिक क्षेत्रमा सक्रिय रहँदै आएका थिए । साहित्यिक र व्यवसायीक क्षेत्रमा समेत क्रियाशील बस्नेत प्रधानमन्त्री देउवाका विश्वासपात्र समेत हुन् ।
पौडेल कांग्रेसका मुख्य सचिव हुन् । देउवा पार्टी सभापतिमा निर्वाचन भएपछि उनलाई पार्टी केन्द्रीय कार्यालयको मुख्य सचिव बनाएका थिए । नेविसंघबाट कांग्रेस राजनीतिमा प्रवेश गरेका पौडेल मुख्य सचिव हुनुअघि शिक्षक संघ र ट्रेड युनियन कांग्रेसमा आबद्ध थिए । उनी स्याङजाको भिरकोट नगरपालिका–१ निवासी हुन् ।
संसदको ठूलो दल नेकपा एमालेले भने सरकारले गर्ने सिफारिशको विरोध गर्ने बताएको छ ।
एमाले सचिव प्रदीप ज्ञवालीले राष्ट्रिय सभाका तीन सदस्य पनि सिफारिश गर्नु सरकारको निर्लज्जताको पराकाष्ठा हुने र आफूहरु त्यसको विरोध गर्ने चेतावनी दिएका छन् ।
‘कामचलाउ भइसकेको सरकारले जनमतप्राप्त सरकारको जसरी काम गर्दै आएको छ, राष्ट्रिय सभाका तीन सदस्य पनि सिफारिश गर्यो भने त्यो निर्लज्जताको पराकाष्ठा हुन्छ,’ ज्ञवालीले भने, ‘हामी त्यसको विरोध गर्छौं ।’
