लहान भदौ १८ गते।प्रदेश २ का ३६ स्थानीय तहले चालू आर्थिक वर्षको बजेट अझै ल्याउन सकेका छैनन् । प्रदेश २ मा १३६ स्थानीय तह छन् । जसमध्ये १ सय स्थानीय तहले बजेट ल्याइसकेको छ ।
असार १० गतेभित्र ल्याइसक्नुपर्ने बजेट प्रदेश २ का ३६ पालिकाले भदौ १७ गतेसम्म ल्याउन नसकेको प्रदेश कोष तथा लेखा नियन्त्रण कार्यालय, जनकपुरले जनाएको छ । कार्यालयका प्रमुख राधेश्याम गिरीका अनुसार निर्धारित समयमा बजेट ल्याउन नसक्ने पालिकाको संख्या सातै प्रदेशमध्ये प्रदेश २ मा सबैभन्दा बढी छ ।
प्रदेश २ का स्थानीय तहमा बजेट र योजना तानातानकै कारण नगरसभा विवादित बनिरहेको छ । प्रदेश २ का आठ जिल्लामध्ये सबैभन्दा बढी रौतहटका स्थानीय तहले निर्धारित समयसीमाभित्र बजेट ल्याउन सकेका छैनन् ।
रौतहटका गरुडा, राजदेवी, ईशनाथ, कुठारिया, देवाही गोनाही, परोहा, फतुवा विजयपुर, बौधीमाई, वृन्दावन र यमुनामाई गरी १० ओटा पालिकाले बजेट ल्याउन नसकेका प्रदेश कोष तथा लेखा नियन्त्रण कार्यालय, जनकपुरले जनाएको छ ।
पर्साका सात पालिकाले पनि बजेट ल्याउन सकेका छैनन् । पर्साका पोखरिया, जगरनाथपुर, धोविनी, पकहा मैनपुर, सखुवा प्रसौनी, ठोरी र जिरभवानी गाउँपालिकाले अझै बजेट ल्याउन नसकेको प्रदेश कोष तथा लेखा नियन्त्रण कार्यालयले जानकारी दिएको छ । बजेट ल्याउन नसकेको जगरनाथपुर मुख्यमन्त्री लालबाबु राउतको गृहनगर हो ।
यस्तै, सिरहाका पनि सात वटा पालिकामा बजेट आउन सकेको छैन । सिरहाका कल्याणपुर, मिर्चैया, अर्नामा, औरही, नवराजपुर, बरियारपट्टी र लक्ष्मीपुर गाउँपालिकाले बजेट ल्याउन सकेका छैन ।
सप्तरीका चारओटा स्थानीय तहले बजेट ल्याउन सकेको छैन । छिन्नमस्ता, राजगढ, महादेवा र सप्तकोशी नगरपालिकाले अहिलेसम्म बजेट ल्याउन नसकेको हो ।
यस्तै, महोत्तरीको सम्सी र पिपरा गाउँपालिको बजेट आउन सकेको छैन । बाराका पनि तीनओटा पालिकाको बजेट आउन सकेको छैन । जिल्लाका सिम्रौनगढ, आदर्श कोत्वाल र विश्रामपुर गरी बाराका तीनओटा पालिकाले बजेट ल्याउन सकेका छैनन् ।
