अर्जुन जम्नेली राई
मोरङ । मोरङको पथरीशनिश्चरे नगरपालिका यही साताबाट सुरुहुने ‘टेन्सबर्ग पथरीशनिश्चरे फुटबल प्रिमियर लिग’लाई राष्ट्रिय टिमका पूर्ब कप्तान सागर थापा लगायतले शुभकामना दिएका छन् ।
पथरीशनिश्चरे नगरपालिका—१, जाँते मोडमा रहेको पथरी रंगलशामा मंसिर २५ गतेबाट ‘टेन्सबार्ग पथरीशनिश्चरे फुटबल प्रिमियर लिग’ हुँदैछ ।
आइतबार अपरान्ह रंगशालामै निस्केर आयोजक टोलीलाई नेपाली फुटबल टिमका पूर्ब कप्तान सागर थापाले फुटबल प्रतियोगिताको लागि शुभकामना दिएका हुन् ।
रंगशालामा आएका थापाले आफूले पनि पथरी रंगशालामा फुटबल खेलेको प्रसंग उल्लेख गर्दै प्रतियोगिताको शुभकामना दिएका थिए ।
उनीसँगै राष्ट्रिय खेलाडि योगेश गुरुङ्ग, रुपेश केशी, बिक्रम लिम्बू, सुजल श्रेष्ठ, बिराज महर्जन, अनन्त थापा, रंजित धिमाल लगायतले शुभकामना दिएका छन् । यी खेलाडिहरुले सामाजिक संजालहरु मार्फत समेत शुभकामना दिदै आएको आयोजक समितिका सदस्य दीपक पुलामी मगरले बताए ।
अधिकांश खेलाडिहरुले परिचयसहित शुभकामना दिने क्रममा पथरी रंगशालामा फुटबल खेलिसकेको बताए । पथरीमा यस अघि दुई वटा गोलकप प्रतियोगिता भएको थियो ।
राष्ट्रिय खेलाडिहरुले सुबेक्षासहितको शुभकामनाले ‘टेन्सबार्ग पथरीशनिश्चरे फुटबल प्रिमियर लिग’को माहोलसँगै क्रेज बढ्दै आएको आयोजक समितिका सदस्य भक्त राईले बताए ।
लिग आयोजक समितिका संयोजक संजिव गिरी, सहसंयोजक बिकी राई, राष्ट्रिय खेलाडिसमेत रहेका दीपक राई लगायतका आयोजक टोली आइतबार रंगशालामा तयारीको क्रममा मैदानमा थिए ।
नेपाली राष्ट्रिय टिमका पूर्ब कप्तान सागर थापा विराटनगर आउँदा नयाँ खोलाडि र आयोजकलाई उत्साह दिनकै लागि पथरी आएको आयोजक समितिले जनाएको छ ।
मोरङ जिल्ला फुटबल संघबाट प्रतियोगिता गराउने अनुमति लिएका पथरीशनिश्चरे फुटबल प्रिमियर लिग आयोजक समितिले पेय पदार्थ उत्पादक कम्पनी टेन्सबर्गसँग मुख्य प्रायोजकको रुपमा संझौता भएको आयोजक समितिको संयोजक संजिव गिरीले बताए ।
लिग कम नकआउटको आधारमा हुने फुटबल प्रतियोगिताको लागि पथरीशनिश्चरे नगरका आठ वटा टिमले उपाधिको लागि भिड्ने छन् । पहिलो चरणमा हुन लिगमा उच्च नम्बरको आधारमा चार वटा टिमले नकआउट भिड्ने छन् ।
लिग खेल्ने आठ वटा टिमले १८ जनाको दरले १४४ जना खेलाडिलाई क्लोज क्याम्प (प्रशिक्षण) गराइरहेका छन् । लिगबाट नगरमा रहेका खेलाडिहरुको लागि अवसरको लागि खेलाडि उत्पादन मुख्य लक्ष्य राखिएको आयोजक तथा खेलाडि दीपक राईले बताए ।
