मोरङ । मोरङको पथरीशनिश्चरे नगरमा तेस्रो पथरीशनिश्चरे प्रिमियर क्रिकेट लिग प्रतियोगिता आगामी असोज तेस्रो सातादेखि हुने भएको छ ।
पथरीशनिश्चरे क्रिकेट प्रिमियर लिगको आयोजनामा असोज २२ गतेदेखि प्रतियोगिता सुरु हुने आयोजक समितिको अध्यक्ष अरुण राईले बताए ।
क्रिकेट प्रिमियर लिगमा सात बाघ, ंमंगलबारे लिजेन्ड, हिसाब किताब ट्राईडेन्ट, रोयल किङ्स, बिरेन्द्रनगर स्टील टाइगर्स, बुद्ध युनाइटेड, क्लासिक ११ हसन्दह र आइतबारे अस्त्र गरी ८ वटा टिम सहभागि हुने आयोजक समितिले जनाएको छ ।
नगरमा क्रिकेट खेलाडी उत्पादन गर्ने मुख्य उदेश्य राखेर आयोजना हुने प्रिमियर लिग क्लवहरुवीच अक्सन मार्फत खेलाडी आबद्ध गरेर प्रतियोगिता गराउदै आएको छ । यस बर्ष २१ गते शनिबार अक्सन हुने बताए ।
एउटा टिममा १४ देखि १६ जना खेलाडी हुन्छ । खेलाडी किन्न अर्थात अनुबन्ध गर्न क्लबले कम्तिमा ४० हजार खर्च गर्नुपर्ने हुन्छ । खेलाडीको खेल हेरेर क्लबहरुले राम्रा खेलाडीहरु बढाबढमा अनुबन्ध गर्नुपर्ने हुन्छ । लिग बिजेता टिमलाई १ लाख ११ हजार १११, दोस्रो हुने क्लबलाई ५५ हजार ५५५ नगद, ट्रफी, मेडल र प्रमाणपत्रहरु प्रदान गरिने अयोजक समितिका कोषाध्यक्ष पुकार राईले बताए । प्रतियोगितामा अनुशासित टिम, उत्कृष्ट ब्याटर, बलर, क्षेत्ररक्षक, उदयमान खेलाडीलाई समेत नगदसहित पुरस्कृत गरिने आयोजक समितिको सदस्य बिरोज मगरले बताए । प्रतियोगिता असोज २२ देखि सुरु भएर कातिक ६ गते समापनहुने धनबहादुर कार्कीले बताए ।
पथरीशनिश्चरेमा सनम दुलाल, सागर कटुवाल, पुर्सोतम न्यौपाने, सुमित राई, अनिल लुइटेल लगायतका खेलाडी जिल्ला र प्रदेशसम्म खेल्दै आएको बताइएको छ ।
पथरीशनिश्चरे नगरमा क्रिकेट खेलाडी उत्पादन र बिकास हुने क्रम रहेपनि खेल मैदानको ब्यबस्था नभएको पथरीशनिश्चरे क्रिकेट प्रिमियर लिग आयोजक समितिको गुनासो छ ।
नगरमा क्रिकेट मैदान नहुदा फुटबल मैदान मै क्रिकेट आयोजना गर्नु परेको र ग्राउण्ड बिग्रिन्छ भनेर गुनासो आउने गरेको आयोजक समितिले जनाएको छ । क्रिकेट खेल्दा फुटबलको मैदानको वीच भागमा भत्किने समस्या हुन्छ ।
यद्यपि क्रिकेट मैदानको लागि नगर प्रमुख लगायतका जनप्रतिनिधिहरुलाई पटक पटक भन्दा पनि वास्ता नभएको आयोजक समितिले गुनासो गरे । क्रिकेट मैदान नभएको कारण पथरीको जाँते मोड स्थित प्रस्तावित पथरी रंगशालामै यो बर्षको क्रिकेट प्रिमियर लिग हुने आयोजकले जनाएको छ ।
