काठमाडौ । सत्तारुढ दल नेपाली कांग्रेस रामेछापका सांसद पूर्णबहादुर तामाङ (कान्छाराम) ले दुई उपप्रधानमन्त्री आगामी निर्वाचनबाट संसदमा नआउन् भन्दै रोष्ट्रमबाटै प्रार्थना गरेका छन् ।
प्रतिनिधिसभाको आइतबारको बैठकमा विनियोजन विद्येयक माथिको छलफलका लागि रोष्ट्रममा पुगेका सांसद तामाङले उपप्रधानमन्त्रीद्धय प्रकाशमान सिंह र विष्णु पौडेल आगामी निर्वाचनबाट संसदमा नआउन् भन्दै प्रार्थना गरेका छन् ।
सांसद तामाङले बजेट विनियोजनमा दुई उपप्रधानमन्त्रीले आयोजना वितरण गर्दा आ–आफ्ना निर्वाचन क्षेत्र र जिल्लालाई मात्रै केन्द्रित गरेको भन्दै आपत्ति समेत जनाएका छन् । उपप्रधानमन्त्री सिंहले सहरी विकास मन्त्रालयका २०७ योजना काठमाडौं जिल्लामा मात्रै राखेको र अन्य जिल्लामा वितरण नगरेको उनको आरोप छ।
सांसद तामाङले सिंहले बजेटमा गरेको असमान वितरणको हिसाब किताब पार्टीको १५ औं महाधिवेशनमा गर्ने चेतावनी दिएका छन् । सिंह र तामाङ दुवै कांग्रेसका सांसद हुन्।
तामाङले आफ्नै पार्टीका उपप्रधानमन्त्रीलाई समेत आगामी निर्वाचनबाट संसदमा नआउन् भन्दै बुद्ध भगवान् र पशुपतिनाथ सग प्रार्थना गरेका हुन् ।
