काठमाडौं ।
नेकपा एमाले र माओवादी केन्द्रबीच चुनावी तालमेल र चुनावपछिको पार्टी एकता आजै टुङ्गिने बताएको छ । माओवादी केन्द्रका नेता देवेन्द्र पौडेलले सहमतीका बिषय आजै टुङ्गिने दावी गरे ।
नेकपा एमाले र माओवादी केन्द्रबीच चुनावी तालमेल र एकताकालागि सहमतिको खाका तयार भएकाले आजै सो सहमतीमा हस्ताक्षर गर्न दुबै पार्टीमा छलफल चलिरहेको छ ।
मंसिरमा हुने निर्वाचनमा तालमेल गर्ने र चुनावपछि पार्टी एकता वा सरकारको नेतृत्व आलोपालो गर्ने लगायत विषयमा सहमति नजिक पुगेको जनाइएको छ । एमालेबाट ६० र ४० प्रतिशतमा चुनावी तालमेलको प्रस्ताव आएको जानकारी दिँदै माओवादी केन्द्रका नेता पौडेलले भने बाँकी बिषयलाई प्याकेजमै टुङ्ग्याउन लागिएको छ ।
हिजो मात्रै माओवादी केन्द्रको केन्दीय सचिवालय बैठकमा एमालेसंगको पार्टी एकताबारे छलफल भएको थियो ।
एमालेले बाम एकताका लागि आब्हान गरेपछि माओवादी केन्द्रले पनि अध्यक्ष पुष्पकमल दाहाल, नेता नारायणकाजी श्रेष्ठ र रामबहादुर थापा रहेको ३ सदस्यीय उच्चस्तरीय समिति बनाएको छ पछिल्लो समय दुबै पार्टीले बाम एकतालाई जोड दिँदै आएका छन् ।
एकीकृत पार्टीको नाम नेपाल कम्युनिष्ट पार्टी (नेकपा) राख्ने, पार्टी सञ्चालनका लागि एमाले र माओवादीबाट ७ शीर्ष नेता रहने गरी संयन्त्र बनाउने, आउँदो चुनावमा एउटै चुनाव चिन्हमा चुनाव लड्ने लगायतका बिषयमा सहमति भैसकेको अनौपचारिक रुपमा सार्वजनिक भएको छ ।
समितिमा एमालेबाट अध्यक्ष केपी शर्मा ओली, बरिष्ठ नेता झलनाथ खनाल, माधबकुमार नेपाल र उपाध्यक्ष बामदेब गौतम रहने जनाईएको छ ।
आज नेकपा एमाले र माओवादी केन्द्रको आन्तरिक र संयुक्त बैठकले सबै बिषय टुङ्गयाउने नेताहरुले दाबी गरेका छन ।
