माघ २४, २०७४ काठमाडौं : पुँजी बजारको नियमक निकाय धितोपत्र बोर्डले सेयर बजार परिसूचक र कारोबार घट्नको कारण सेयर लगानीकर्ताहरु पर्ख र हेरको नीतिमा भएको बताएको छ। बोर्डका निर्देशक नीरज गिरीले नयाँ सरकार सेयर बजारमा ल्याउने नीति र बैंक तथा वित्तीय सस्थाको अर्धवार्षिक प्रतिवेदनलाई हेरर लगानीकर्ताहरु पर्ख र हेरको स्थितिमा रहेको र त्यसको प्रभाव सेयर बजारमा देखिएको बताए। 'घट्नु बढ्नु स्वभाविक प्रकिया भए पनि निरन्तर सूचक गिरावाट र कहिले ३०/४० करोड मात्रै कारोबार भएको पनि देखिएको छ।' गिरीले भने, 'नयाँ सरकारले कस्तो नीति ल्याउँछ, के गर्छ भन्ने पनि देखिन्छ। त्यस्तै बैंक तथा वित्तीय संस्थाको अर्धवार्षिक प्रतिवेदन कस्तो आउँछ हेरौँनत भनेर पनि लगानीकर्ता पर्खेको देखिन्छ।' त्यस्तै, बैंक तथा वित्तीय संस्थामा पुँजी वृद्धिको प्रभाव पनि सेयर बजारमा देखिएको बोर्डको प्रतिक्रया छ। 'धेरै बैंक तथा वित्तीय संस्थाले हकप्रद सेयर र बोनस सेयरबाट पुँजी वृद्धि गरेका छन्, त्यसको स्वभाविक प्रभाव सेयर बजारमा देखिएको छ, राष्ट्र बैंकको पुँजी वृद्धिको प्रभाव सेयर बजारमा देखिएकै हो' गिरीले भने। उनले सिआस्वा कार्यन्वयनमा आउँदा सेयर लगानीकर्ताहरुलाई सहज हुने र एक महिनामा नै सेयर कारोबार हुने बताए। सेयर भर्नका लागि लाग्ने लाइन, सेयर नपरेको रकम खाता फिर्ता र एक महिनाभित्र सेयर कारोबारमा पठाउनका लागि सिआस्वा लागु गरिएको उनले बताए। आस्वामा प्रणाली बैंकमा गए रुजु गराएर गर्दा समय लाग्ने भएको कारण एकीकृत सिस्टमबाट बाँडाफाँड कार्य गर्न एक हप्ताभित्र गर्न सकिने र कारोबार एक महिनामा हुनसक्ने बताए।
