काठमाडौं । प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीच भएको भेटवार्तापछि नेपाल–भारत १२ बुँदे संयुक्त वक्तव्य जारी भएको छ ।
संयुक्त वक्तव्यमा ओली–मोदीबीच दुई देशबीचको सरकारी, नीजि क्षेत्र र जनस्तरको सम्बन्धका विषयमा छलफल भएको उल्लेख छ ।
नेपाल भारतबीचको सम्बन्धमा नयाँपन दिन तथा ऐतिहासिक र सांस्कृतिक निकटलाई थप घनिष्ट बनाउन नियमित रुपमा उच्चस्तरीय राजनीतिक भेट तथा सन्देश आदानप्रदानलाई निरन्तरता दिन दुई देशका प्रधानमन्त्री सहमत भएको कुरा पनि लेखिएको छ ।
वक्तव्यमा, भारतले व्यवहारमा ल्याएको ‘सवका साथ सवका विकास’ अवधारणा नेपालको विकास र समृद्धिको लागि मार्गदर्शक बन्न सक्ने मोदीले विश्वास लिएको र ओलीले पनि आर्थिक विकासका लागि आफ्नो सरकारले पनि ‘समृद्ध नेपाल सुखी नेपाल’ को नारा अबलम्बन गरेको बताएको संयुक्त वक्तब्यमा उल्लेख छ ।
यस्तै, भारतीय प्रधानमन्त्री मोदीले सफलतापूर्वक स्थानीय तह, प्रदेशसभा र प्रतिनिधिसभा निर्वाचन सम्पन्न गरेकोमा बधाई दिँदै अब नेपाल सरकारको भिजनअनुसार नेपाल स्थायित्व र विकसको दिशामा अग्रसर हुने विश्वास लिएको पनि वक्तव्यमा भनिएको छ । दुबै प्रधानमन्त्रीले वीरगन्जस्थित एकीकृत चेकपोस्टको उद्घाटन गर्नुका साथै मोतिहारी–अमलेखजन्ज क्रसबोर्डर पेट्रोलियम पाइपलाइनको उद्घाटन भएको पनि संयुक्त वक्तव्यमा उल्लेख छ ।
कृषिमा दुई पक्षीय सहयोग आदान–प्रदान, रक्सौल–काठमाडौं रेलमार्ग निर्माण र अन्तरदेशीय जलमार्गका सम्बन्धमा पनि दुई देशबीच महत्वपूर्ण समझदारी भएको छ । वक्तव्यमा प्रधानमन्त्री ओलीले भारतमा उच्चमा सम्मान पाएकोमा मोदीलाई धन्यवाद दिँदै उपयुक्त समयमा मोदीलाई नेपालको भ्रमणका लागि निम्तो दिएको उल्लेख छ ।
जवाफमा मोदीले ओलीको निमन्त्रणा निम्तो स्वीकार गरेर कुटनीतिक तहबाटै भ्रमणको मिति तय गर्ने भनेको वक्तव्यमा उल्लेख छ । दुबै प्रधानमन्त्री नेपाल–भारतबीच भएका सम्झौताहरुको सीघ्र कार्यान्वयमा पनि सहमति भएका छन् । शुक्रबार भारतको राजकीय भ्रमणमा निस्केका प्रधानमन्त्री ओली आइतबार स्वदेश फर्कने कार्यक्रम छ ।
संयुक्त वक्तव्य
