विर्तामोड- माओवादी सशस्त्र संघर्षका क्रममा १६ वर्षदेखि टाउकोमा गोली लिएर बसेकी एकजना महिलाको शल्यक्रिया विएण्डसी टिचिङ हस्पिटलले निःशुल्क गरिदिएको छ। हस्पिटलका न्यूरो सर्जनद्वय डा. पंकज नेपाल र डा. दिनेश थापा नेतृत्वको टोलीले साँढे पाँच घन्टा लगाएर माओवादी पूर्व लडाकु अनुपा राईको टाउकोमा रहेको गोली निकालेको हो।
२०५९ साल बैशख २४ गते भोजपुरको चैनपुर आक्रमणका क्रममा सेनाको बंङ्करमा परी हिलिहाङ गाउँपालिका –७ पाँचथरकी राई घाइते भएकी थिइन्। सशस्त्र संघर्षका क्रममा राईलाई गोली लागेको थियो।
उनको शरीरका दुईवटा गोली निकालिएको न्यूरो सर्जन डा. पंकज शर्माले बताए। टाउकोमा दिमागलाई नै असर गर्ने गरी रहेको एउटा र अर्को घाँटीमा रहेको गोली निकालिएको उनले जानकारी दि।
गत मंगलबार राईको शल्यक्रिया भएको थियो। शल्यक्रियापछि आफू स्वस्थ रहेको राइले बताइन्। आफ्ना लागि निःशुल्क शल्यक्रिया गरिदिएकोमा हस्पिटललाई उनले धन्यवाद दिइन्। राईले भनिन्, ‘मेरो उपचारका लागि यत्रो ठूलो सहयोग गरिदिनु भएकोमा अस्पताललाई धन्यवाद दिन्छु।’
