९ वैशाख २०७५, पथरी
मोरङको पथरीशनिश्चरे ५ हसन्दहमा दलित उत्थान वर्ग समितिले नगरमै उदाहरणीय कार्य गरेको छ । नगरबाट दलित उत्थान वर्गका लागि भनेर बिनियोजन भएको ५० हजार रकमबाट १९ वटा बाख्राका पाठीहरु खरिद गरेर वितरण गरिएको छ । वडामा रहेका दलित समुदायका मानिसहरु मध्येबाट अतिविपन्न परिवारको छनोट गरी पाठी वितरण गरिएको हो । अघिल्ला वर्षहरुमा पनि गाविसबाट बजेट आउने तर ठोस काम कुनैपनि नभइरहेको अवस्था थियो । हाल नया समिति बनेपछि अध्यक्ष सुमन विश्वकर्माले सबैलाई फाइदा हुने खाल्को कामको सुरुवात गरेका हुन् ।
यस पटक वितरण गरिएको पाठीबाट बच्चा जन्मिएपछी समितिलाई बोका भएका त्यसको आधा र पाठी भएमा सिङ्गो पाठी नै पहिलो पटक बुझाउनु पर्नेछ । अहिले वितरण गरिएको पाठी मरेमा त्यसलाई पनि समितिलाई अनिवार्य देखाउनुपर्ने समिले नियम बनाएको छ । समितिलाई बुझाइएको पाठी अर्कोपटक फेरी अन्य घरपरिवारलाई वितरण गरिने अध्यक्ष सुमनले बताएका छन् ।
वडामा नै पहिलोपटक लक्षित वर्गको कार्यक्रममा यस्तो उदाहरणिय कार्य गरेको वडा अध्यक्ष जोग बहादुर धिमालले बताएका छन् । अन्य वर्षहरुमा देखिने काम भएको थिएन तर यो वर्ष समितिले राम्रो काम गरेको अध्यक्ष धिमालले बताए ।
अघिल्ला वर्षहरुमा लक्षित वर्गको बजेटको सुइको सम्म नपाएका स्थानिय दलित समुदायका मानिस पनि पाठी पाएपछि दंग परेका छन् । आफुहरुलाई खुसी लागेको र अब पाठीको राम्रो हेरचाह गर्ने उनिहरुले बताएका छन् ।
