काठमाडौँ। प्रधानमन्त्री केपी शर्मा ओलीले विश्वको सर्वोच्च शिखर सगरमाथाको सफाई अभियानमा लाग्न सबैलाई आह्वान गरेका छन् ।
प्रधानमन्त्री ओलीले सगरमाथाको सफाई अभियानलाई साझा अभियानको रुपमा संचालन गर्न संस्कृति, पर्यटन तथा नागरिक उडड्यन मन्त्रालयलाई पनि सचेत गराए ।
पासाङ ल्हामू पर्वतारोहण प्रतिष्ठानको रजत दिवसको अवसर पारेर सोमबार काठमाडौंमा आयोजित एक कार्यक्रमलाई सम्बोधन गर्दै उनले विश्वको सर्वोच्च शिखर सगरमाथालाई स्वच्छ र सफा राख्न तथा त्यसको पवित्रतालाई जोगाउन सबैको साझा, संगठित र उद्देश्यमूलक प्रयास हुनुपर्ने आवश्यकता पनि औंल्याए ।
प्रधानमन्त्री ओलीले फोहोरकै कारण सगरमाथाको आरोहण अवरुद्ध हुने अवस्था आउन नदिन पनि मातहतका निकायको गम्भिर ध्यानाकर्षण गराए । उनले सावधानीपूर्वक सगरमाथा आरोहण गर्न पनि आग्रह गरे । सरकारले सगरमाथा आरोहण गर्ने क्रममा हुने जोखिम न्यूनिकरणमा विशेष जोड दिने प्रधानमन्त्री ओलीको भनाई छ ।
प्रधानमन्त्री ओलीले मुलुकको पर्यटन क्षेत्रको विकासमा पर्वतारोहण आरोहणले महत्वपूर्ण योगदान दिएको पनि स्मरण गराए । त्यस अवसरमा उनले विश्वको सर्वाेच्च शिखर सगरमाथाको सफल आरोहण गर्ने स्वर्गीय पासाङ ल्हामू शर्पाको योगदानको पनि चर्चा गरेका थिए ।
पासाङ ल्हामु शेर्पाको २०५० साल वैशाख १० गते सगरमाथाको सफल आरोहणपछि फर्कने क्रममा निधन भएको थियो ।
