१२ वैशाख २०७५, पथरी
मोरङको पथरीशनिश्चरे ५ र ६ मा पर्ने साविक हसन्दह गाविसमा पूर्ण सरसफाइको कामले तिब्रता पाइरहेको छ । २०६८ सालबाट खुल्ला दिशा मुक्त अभियानका रुपमा अगाडी बढाइएको कार्यक्रम २०७२ साल जेष्ठ २६ गते हसन्दह गाविसलाई नै खुल्ला दिशामुक्त गाविस घोषणा गरिएको थियो ।
हाल पूर्ण सरसफाइ अन्तरगतका कार्यक्रमहरु निरन्तर अगाडी बढिरहेको ५ नं. वडा अध्यक्ष जोगबहादुर धिमालले बताउनुभएको छ । भर्खरै मात्र वडा नं. ६ को मंगलबारे बजार आसपासमा सरसफाइ कार्यक्रम गरिएको र आगामी कार्यक्रममा पनि पूर्ण सरसफइका निकै कामहरु बाकी रहेको ६ नं. वडा अध्यक्ष जयबहादुर तामाङले बताउनुभयो ।
यसै अन्तरगत महिनावारी सरसफाइ स्वच्छता व्यवस्थापन सम्वन्धि हिजो र आज गरी २ दिने तालिम पनि सम्पन्न गरेको छ । तालिमको सहजिकरण सि एस डि सी बिराटनगरकी सपना तिवारी र तिलक नेपालीले संयुक्त रुपमा गरेका थिए । तालिममा ४० जना महिलाहरुको सहभागिता रहेको थियो । तालिमबाट समाजमा रहेको महिनावारी सम्बन्धिको अन्धविश्वास हटाउन मद्धत गर्नुका साथै महिनावारीलाई कसरी सही तरिकाले व्यवस्थापन गर्न सकिन्छ भनेर सहजिकरण गरिएको छ ।
तालिम पश्चात आफैले घरमा नै सेफ्टी प्याड बनाउन सक्ने र प्रभाबकारी रुपमा महिनावारी स्वच्छता गर्न सकिने भएको सहभागिहरुले बताएका छन् । 
