काठमाडौं, १३ बैशाख । नेकपा माओवादी केन्द्रले पार्टी एकता गर्दा बराबरीको हैसियत माग्दै पार्टीको संगठन सुदृढिकरण अभियानलाई सशक्त बनाउन लागेको छ ।
माओवादी केन्द्रका अध्यक्ष पुष्पकमल दाहाल ‘प्रचण्ड’ले संगठन सुदृढीकरणको अभियान सुरु गरेका हुन् । आइतबार बिहान खुमलटारस्थित निवासमा बसेको केन्द्रीय कार्यालय (हेडक्वार्टर) को बैठकले पार्टी संगठन सुदृढ बनाउने निर्णय गरेको हो ।
बैठकले पार्टी संगठनलाई कसरी सुदृढ बनाउने भन्ने निर्णय गर्न र कार्ययोजना निर्माणका लागि पार्टी सचिवालयको बैठक बोलाउने निर्णय गरेको छ ।
तत्कालीन समयमा लडाकु समायोजनको कुरा हुँदा प्रचण्डले सर्वसाधारण र उमेर नपुगेकालाई समेत लडाकुको बिल्ला भिराइदिएका थिए । अहिले फेरि प्रचण्डले सेना समायोजनको बेलामा जस्तै हर्कत एमालेसँग देखाउनका लागि संगठन सुदृढिकरणको अभियान सार्वजनिक गरेको बताइन्छ ।
अध्यक्ष प्रचण्ड एमालेसँग तत्काल पार्टी एकता नहुनेमा विश्वस्त भएपछि नयाँ योजना सुरु गरेको नेताहरु बताउँछन् । हेडक्वार्टर बैठकमा बोल्ने अधिकांस नेताहरुले एकता समानताका आधारमा सम्मानजनक ढंगले हुनुपर्ने र त्यो न्यायोचित हुनुपर्ने कुरामा जोड दिएका थिए ।
जनयुद्धलाई हेर्ने दृष्टिकोण, चुनाव चिन्ह र कमिटीहरुमा भागबण्डाको विषयमा एमाले र माओवादीबीचमा विवाद देखिएको छ । तीन विषयमध्ये सबैभन्दा जटिल र पेचिलो चाहिँ पदीय भागबण्डा रहेको नेताहरु दावी गर्छन ।
माओवादी केन्द्रले समानताका आधारमा कमिटी निर्माण हुनुपर्ने भन्दै राखेको अडान स्वीकार गर्न एमाले तयार नभएपछि कुरा विग्रिएको नेताहरु बताउँछन् ।
