काठमाडौँ। महानगरिय अपराध अनुसन्धान महाशाखाका तत्कालिन प्रमुख प्रहरी वरिष्ठ उपरीक्षक (एसएसपी) दिवेश लोहनी पक्राउ परेका छन् ।
साढे ३३ किलो सुन काण्डमा बयान दिन मोरङ पुगेका उनलाई प्रहरीले पक्राउ गरेको हो । उनलाई पक्राउ पूर्जी थमाउँदै पक्राउ गरिएको जनाइएको छ । केही दिन अघि साढे ३३ किलो सुन काण्डमा बयानको लागि छानबिन समितिले एसएसपी दिवेश लोहनीलाई पत्र काटेको थियो ।
घटनाको अनुसन्धान गर्न गठित समितिले उनलाई बयानका लागि आज बुधबार जिल्ला प्रहरी कार्यालय, मोरङ बोलाएको थियो । यसअघि सुनकाण्डमा ६ जना प्रहरीलाई नियन्त्रणमा लिई उच्चस्तरीय छानविन समितिले अनुसन्धान गरिरहेको छ । उक्त समितिलाई सरकारले गठन गरेको हो ।
गत माघको पहिलो साता त्रिभुवन विमानस्थल हुँदै बाहिरिएको ३३ केजी सुन काण्डसँगै तीन जनाको शंकास्पद मृत्युले यो प्रकरण धेरै रहस्यमय बन्दै गएको छ । तर यस काण्डका मुख्य तस्कर चूडामणि उप्रेती (गोरे) भने अझै फरार छन्।
