दमक। बुधबारदेखि शुरु प्रथम दमक गोल्डकप नकआउट फुटबल प्रतियोगितामा मदन भण्डारी स्पोर्टस् एकेडेमीले शानदार जितका साथ विजयी शुरुवात गरेको छ ।
दमक–९ स्थित दमक बहुमुखी क्याम्पसको खेल मैदानमा सम्पन्न उदघाटन खेलमा मदन भण्डारीले रमपम झापा–११ लाई शून्यकाविरुद्ध ४ गोलले हरायो । मदन भण्डारी स्पोर्टस् एकेडेमीको जितमा मापवेलले दुई गोल गरे । त्यस्तै प्रकाश बुढाथोकी र सेडरिक आवाले थप एक–एक गोल गरेका थिए ।
यसअघि पहिलो हाफको शुरुवाती समयमा झापाले प्राप्त पेनाल्टीलाई सदुपयोग गर्न नसक्दा खेलमा अग्रता लिनबाट चुकेको थियो । कर्ण लिम्बुले प्रहार गरेको उक्त पेनाल्टी बारमा लागेर फर्किएको थियो । बुधबारको खेलमा मदन भण्डारीका सौजन राई म्यान अफ द म्याच घोषित भए ।
यो जितसँगै मदन भण्डारी स्पोर्टस् एकेडेमी क्वाटरफाइनलमा प्रवेश गरेको छ । प्रतियोगिता अन्तरगत बिहीबारको खेल आयोजक दमक–११ र करेन्ट रुपन्देही–११ बीच हुने आयोजकले जनाएको छ ।
दमक नगरपालिकाको आयोजनामा जारी प्रतियोगिताको विजेताले उपाधिसहित नगद १३ लाख ५१ हजार हात पार्नेछ भने उपविजेताले ६ लाख प्राप्त गर्नेछ । त्यस्तै प्रतियोगिताको फाइनल खेल बैशाख २८ गते शुक्रबार हुनेछ ।
