काठमाडौँ। सिण्डिकेट कायम राख्न पाउनु पर्ने माग गर्दै आन्दोलनमा उत्रिएका यातायात व्यवसायीले शुक्रबार सार्वजनिक यातायात सेवा ठप्प पारेका छन् । जसका कारण राजधानी उपत्यकामा विहानैबाट सार्वजनिक यातायातका साधन चलेका छैनन् ।
चक्रपथमा मयुर यातायातले सीमित सवारी चलाएपनि त्यो पर्याप्त देखिएको छैन । विशेष गरेर राजधानीका चोकचोकमा परीक्षा दिन हिँडेका विद्यार्थीहरु अलपत्र परेका छन् ।
'गाडी बन्दु हुने थाहा नै भएन परीक्षा केन्द्र ग्लोबल कलेजमा परेको छ', सुकेधारामा भेटिएका एक परीक्षार्थी दृष्टि कोइरालाले भनिन्– अब परीक्षा केन्द्र सम्म कसरी पुग्ने अन्यौलमा छु । उनी त एक पात्र मात्रै हुन् । दृष्टि जस्ता आज परीक्षा दिन हिँडेका कयौं विद्यार्थीहरु सवारी साधन नपाएर अलपत्र मात्रै परेका छैनन् परीक्षा दिन जान पाउने होकी होइन भन्ने चिन्तामा छन् ।
यसअघि सरकारले यातायात व्यवसायीको एकाधिकार तोड्न भन्दै उनीहरुको सिण्डिकेट खारेज गर्ने निर्णय गरेको थियो । निर्णयसँगै यातायात व्यवसायीले उक्त सिण्डिकेट खारेजको माग गर्दै करिब एक महिना अगाडि आन्दोलनको घोषणा गरेका थिए ।
सोही आन्दोलन स्वरुप नेपाल यातायात व्यवसायी राष्ट्रिय महासंघले आज यातायात ठप्प गरेका हुन् । यातायात व्यवसायले २८ गते अनिश्चितकालीन यातायात ठप्प पार्ने समेत घोषणा गरेको छ ।
