काठमाडौं । भारतीय प्रधानमन्त्री नरेन्द्र मोदी यही बैशाख २८ गते नेपाल भ्रमणमा आउँदै हुनुहुन्छ । जनकपुरदेखि मुक्तिनाथसम्मको धार्मिक यात्रा गर्ने मोदीको भ्रमणका लागि तयारी समेत धमाधम भईरहेको छ ।
तर, तयारीका नाममा केही अवाञ्छित गतिविधि समेत गर्न खोजिएको आशंका गरिएको छ । मोदीको भ्रमणको सुरक्षा तयारीका लागि भन्दै केही दिन यता भारतीय सुरक्षा निकायको ठुलै डप्फा नेपालमा रहेको छ ।
सुरक्षा चुनौती रहेका मोदीको सुरक्षा ग्यारेन्टी गर्न खोज्नु अन्यथा होइन । तर तयारीको नाममा भारतीय वायुसेवाका हेलिकप्टर जताततै उडाएर नेपालको सार्व भौमिकतामाथि हस्तक्षेप गर्ने घुमाउरो प्रवृत्ति भारतीयहरुले देखाएका छन् ।
भारतीय सुरक्षाकर्मी वा खुफिया एजेन्सीहरुले सुरक्षा जाँच गर्ने हो भने पनि नेपाली सुरक्षाकर्मीहरुलाई नै अघि लगाएर गर्नुपर्ने कुटनीतिक मान्यता हो । तर यति बेला जनकपुरदेखि मुक्तिनाथसम्म भारतीयहरुको दैनिक चुरीफुरी बढेको छ, नेपालीपत्रमा उल्लेख छ ।
राजनीतिक नेतृत्वले राम्रै गर्न खोज्दा खोज्दै पनि भारतीय खुफिया एजेन्सीहरुले हैकमवादी प्रवृत्ति देखाउँदा नेपाल-भारत सम्बन्धलाई सहयोग नपुग्ने स्पष्ट छ ।
