उदयपुर । दावेदार मानिएको मनाङ मस्र्याङ्दी क्लब पाँचौं रमपम उदयपुर गोल्डकप नकआउट फुटबल प्रतियोगिताको सेमिफाइनलमा प्रवेश गरेको छ । अधिकांश नयाँ अनुहारलाई लिएर उत्रिएको मनाङले आयोजक उदयपुर–११ लाई शून्यकाविरुद्ध १ गोलको झिनो अन्तरले हरायो ।
गाईघाटस्थित थरुहट उदयपुर रंगशालामा आइतबार सम्पन्न खेलमा मनाङले गोल गर्न अन्तिम समयसम्म संघर्ष गर्नुपर्यो । मनाङका लागि खेलको ८३ औं मिनटमा बिमल रानाले एक मात्र निर्णायक गोल गरे । आइतबारको खेलमा उदयपुरका गोलरक्षक रेम्बो चौधरी म्यान अफ द म्याच घोषित भए ।
प्रतियोगिता अन्तरगत सोमबारको खेल अर्को दावेदार टोली रुस्लान थ्रीस्टार क्लब र मोरङ–११ बीच हुने आयोजकले जनाएको छ । उदयपुर जिल्ला फुटबल संघको आयोजनामा जारी प्रतियोगिताको फाइनल जेठ ५ गते हुनेछ ।
