दाङ । नेपाली कांग्रेसका पूर्व महामन्त्री कृष्णप्रसाद सिटौलाले देश निर्माणमा नेपाल जेसीजले महत्वपूर्ण भूमिका निर्वाह गर्दै आएको बताएका छन् ।
बिहिवार राजनीतिक भेटघाटको क्रममा दाङ पुगेका सिटौलालाई दाङ महिला जेसीजले आयोजना गरेको स्वागत तथा सम्मान कार्यक्रममा बोल्दै कांग्रेसका केन्द्रीय सदस्य समेत रहेका नेता सिटौलाले ईश्वरमा आस्था राखेर सामाजिक सेवामा समर्पित जेसीजले लाखौँ युवाहरुको व्यक्तित्व र नेतृत्व विकाससँगै देश निर्माणमा योगदान गर्दै आएको बताएका हुन् ।
पूर्व ग्रहमन्त्री समेत रहेका सिटौलाले जेसीजकै माध्यमबाट समाजमा पछि परेका महिलाहरुलाई पनि सामाजिक नेतृत्व गर्न सक्षम बनाउँदै गएको बताउँदै निरन्तर सामाजिक क्षेत्रमा अघि बढ्न दाङ महिला जेसीजलाई शुभकामना समेत दिए ।
कार्यक्रममा बोल्दै दाङ महिला जेसीजकी अध्यक्ष डोमा पाण्डेले महिलाहरुको नेतृत्व विकासका लागि जेसीजले जुन काम गरेको छ त्यसै आधारमा राज्यले पनि महिलाहरुलाई विशेष स्थान दिन आग्रह गरिन् ।
अध्यक्ष डोमा पाण्डेको अध्यक्षतामा भएको कार्यक्रममा जेसीज आस्थापाठ अनिता ढकालले गरेकी थिइन । निवर्तमान अध्यक्ष निरजा पोखरेलले स्वागत गरेको कार्यक्रको सञ्चालन महासचिव ममता विष्टले गरेकी थिइन् ।
